Opinion
Deman, los robòts umanoïds ...
Los robòts umanoïds se desenvolòpan de mai en mai, mesclan intelligéncia artificiala, assisténcia fisica, interaccion sociala. Fan flòri. Podèm pas dins l’encastre d’aquel article los nomenar totes. Ne’n vaquí just quauques uns per ensajar de balhar una idèa del ròtle que jogaràn deman.
Òptimus-Gen2 es un robòt umanoïd fargat per Teslà. Amb son captator de punta e son ret neuronal, amai se se desplaça pro d’aiseta, va èsser una ajuda granda dins la vida de cada jorn. Podrà, amb de gèsts lèstes e menimoses, triar de farda, servir d’aiga, dobrir la mala de la veitura, portar las crompas, netejar la cosina, manejar de materials embolhats... A mai s’es pas encara autonòm a de cent de cent, los qu’an agut l’astre de poder rescontrar Òptimus, escambiar amb el, foguèron pertocats per l’umanoïsacion mai qu’avançada d’aquela « maquina ». Benlèu qu’aquel robòt umanoïd, per l’ora en fasa de tèst, jogarà un ròtle màger dins las annadas venentas.
Ameca concebut per Engineered Acts es benlèu un dels mai avançats en matèria d’interracion sociala. Pòt aisidament s’esmòure, risolejar, far la bèba... mas lo punt fòrt d’aquel robòt umanoïd es de poder escambiar, téner de convèrsas d’un biais natural coma e amb los umans. Aiceste, es pas concebut per los trabalhs fisics coma escurar l’ostal, portar cargas... Jogarà un ròtle social coma aculhir, conselhar, entresenhar,... que siá dins los establiments publics, las garas, los musèus, las bibliotècas, ... Lo jorn ont serà devengut mens carestiós podrà benlèu èsser aquesit per de collectivitats, de societats, d’entrepresas... mas, alara, que devendràn aqueles emplècs tenguts per d’umans de carn e d’òsses?
Clòne Robotics ven de lançar son robòt umanoïd Clòne Alpha. Es bastit sus una arquitectura biometrica novèla. Revèrta los organs e los sistèms del còs uman coma los muscles, los òsses e los desnosadors. S’apuèja mai que mai suls muscles artificials, los miòfibers. Aqueles muscles se tiban e se destiban mercé a la quichada idrolica. Aqueles miòfibers permetan al Clòne Alpha de moviments plegadisses, fluids e naturals, de soslevar de cargas pesugas sens gastar energia de tròp. Podriá aital portar prodèl a las personas endecadas; automatizar cèrt cargas domesticas; plaça prener dins de tascas embolhosas dins lo domèni de l’industria o de la medecina. Los concebeires de Clòne Alpha li desiran un avenidor de tria.
Uèi, los robòts jògan ja un ròtle màger dins maites domènis. Deman, los robòts umanoïds dintraràn dins nòstra vida per ajudar, escambiar amb nosautres... E benlèu un jorn, qual sap, nos aremplaçaran lo còs, lo còr e la tèsta. Alara, de que faràn las femnas e los òmes? Coma se ditz, sol es lo deman que nos dirà lo deman!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Òu, l’Andrieu, te lanças dins lo comèrci robotic?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari