Despí quora?

La morra es benlèu lo juec lo mai vielh dalh monde. D’efècte, de pinturas funeràrias de mai de 4000 ans que la presentan son estachas trobaas en Egipta. Un juec de paure, un paure juec qu’a traversat los sègles, lo juec a bravat tots los bandiments per conóisser una renaissença en la Contea a la fin de las annaas 1990.

Ce qu’es?

Los dos jugaires si fan tèsta. Tot-als dos ensèm, braman un nombre e mòstran un nombre de dets emb una man. L’objectiu es d’endevinar, de preveire la soma dals dets de las doas mans mostraas, la mieu e aquela dalh mieu adversari. Es simple ansin! Se mòstro 3 dets, m’imagino que lo mieu aversari va mostrar 4 dets, anóncio alora 7 (4 + 3).

Es un juec d’astre?

Es ren pròpi lo cas, estent que d’estrategia, una bòna memòria e sobretot totplen d’intuicion fan que los morraires experimentats si distingan lèu. En mai d’aquò, la vitessa dalh juec provòca “d’enganas”, de repeticions en las anóncias, que los jugaires los mai finòchos pòlon endevinar.

Coma?

Pòlo jugar a 1 còntra 1, 2 còntra 2, 3 còntra 3 eça.. Tant que ganho, juego, quora perdo, es lo mieu equipier que pilha la seguiá. Subretot, chal jugar en lo meme temps e anonciar qu’ai ganhat lo ponch en bramant “Marca!” o “ A ieu!”. Los morraires braman en gavòt o en niçard. Las partiás se fan generalament en doas mènas ganhantas de 15 ponches.

Ont?

La morra (prononciat « mourro » en gavòt/ vivaroalpenc), mourre, mourro, morra, murra si juga sobretot a l’entorn de la Mar Mediterrànea: la Contea de Nissa, las Autas Alps, Savòia, Corsega, Sardenha, Aragon, Catalonha, en Itàlia tota, desbordant fins en Eslovenia e en Croacia vesinas. Segon las regions, las practicas pòlon èstre diferentas: assetat, drech, lo ponh serrat valent 1 o valent minga (zèro), rapiditat dalh juec. Totun, la tòcha de basa es la mema.

Cu?

D’associacions, fièras de la sieu cultura e estachaas a la sieu terra, militan per la transmission d’aquèl juec considerat coma un element identitari. Alh nòstre, es l’associacion Morra dals Quatre Cantons que fa referença. Quatre Cantons es lo nom de la montanha situaa alh mitan dals tres païses fondators: Tièri, Pierlas e Ilònsa.

Quora?

Cada an, un campionat d’estiu sonat lo « Gavouòt Mourra Tour » (Gavòt Morra Torn), mescla concors e mòstra. Es organizat per la nòstra associacion, en tot lo canton e fòra. Tanben, rechampament alh nivèl internacional, lo « Mourra Moundo », permete als morraires de si veire, de si confrontar e d’eschambiar sus las sieu practicas culturalas.

Alora fètz la morra e ren la guèrra! (mourrabella@gmail.com)