Una de las claus del succès d’aqueste jornal que sètz a legir es sa politica favorabla a l’expansion e difusion dels blògs en occitan. Aculhir de desenats de blògs d’un biais absoludament desinteressat dins Jornalet entraïna una enòrma difusion del jornal e una granda circulacion de vesitaires. Es, de fach, una de las partidas mai dinamicas d’aqueste jornal vòstre. Coma ja se passa amb los autres contenguts, s’accèpta de blògs de tota sòrta, tant que respectaràn las nòrmas mai essencialas de l’educacion e del respècte envèrs los autres.
 
Mas la causida d’aculhir totes aqueles blògs foguèt pas per far mai de difusion de Jornalet. Brica. Lo lèma d’aqueste jornal es “Legís, pensa, escriu”. La tresena partida d’aquel triangle vertuós es precisament d’escriure e partejar de vejaires. Aquò se pòt far en pausant de comentaris a las actualitats o a las opinions, en participant als sondatges o en creant de blògs. Totjorn disèm que l’occitanisme serà viu e capitarà ben s’es tan plural coma la societat occitana: los uniformismes aluènhan lo mond e cal que l’occitan siá un caireforc de pensadas, de debats e d’argumentacions. Los blògs son la riquesa del debat occitanista, coma se passa dins las autras lengas. S’aviam pas de blògs en occitan, seriam al bòrd de la mòrt de la nòstra lenga sus Internet.
 
A prepaus, Jornalet aculhís ja, après un pauc mai de dos ans de vida, 91 blÒCs. Sèm, doncas, plan près de la chifra simbolica de 100 blògs. Aquò, qu’als uèlhs de mantes francofòns pòt semblar una quantitat modèsta, vòl dire que i a, darrièr, gaireben un centenat d’occitans qu’emplegan la lenga amb tota naturalitat per exprimir çò qu’interèssa mai lo malhum numeric. E cresètz-nos, quand vos disèm que los blògs an, en general, fòrça bon aculhiment de la part del public, aquò que demòstra, de rebucada, l’interès per la lenga e per las opinions exprimidas dins aquesta lenga. Nos en cal felicitar totes, d’aqueste dinamisme, e fasèm una crida per arribar als 100 blògs plan lèu.