Cup: finala Warrington-St Helens
 
Aqueste dissabte, a Bolton, las jogairas de Leeds baton Castleford 16-10 e sèrvan la Cup.
 
En mièja finala de la Cup, l’oposicion Warrington contra Hull FC tenguèt sas promessas. Los Lops menèron 10-8 a la pausa. Ajustèron un ensag a la represa, mas a un quart d’ora de la fin, Hull FC tornava a 2 punts. Las atacas d’Hull trapèron pas de conclusion positiva e una palma perduda a la darrièra minuta confortèt la victòria de Warrington: 22-14. Los Lops tornaràn trapar Wembley aprèp lor desfaita de l’an passat fàcia als Dragons. De Dragons que rescontraràn aqueste dissabte 3 d’agost a 6 oras del vèspre a Brutus.
 
Se pensava que la segonda mièja finala seriá desequilibrada entre lo cap de fila de la Superliga, St Helens, e Halifax, en mitan de tablèu del Championship. Los Sants deguèron esperar la 35a minuta per marcar lo primièr ensag per Roby dins l’estil lo mai classic del talonaire al ras del tengut (8-2 a la pausa). Halifax se multipliquèt en defensa, mas los Sants ajustèron tres ensages per validar la bilheta per Wembley pel dissabte 24 d’agost: 26-2. Halifax reçauprà Tolosa aqueste dimenge pel compte del Championship.
 
 
Maloney serà Dragon l’an que ven 
 
Lo mièg de dobertura de Penrith, que ven de prene part a la victòria dels Blaus dins los Estats d’Origina, l’internacional australian James Maloney portarà lo malhòt sang e aur las doas sasons venentas (una tresena en opcion). Lo jogaire voliá venir en Euròpa e expliquèt qu’èra mai agradiu d’èsser dins lo sud de França que dins lo nòrd d’Anglatèrra. La paga del jogaire es pas compresa dins la massa salariala acordada a cada formacion. Lo president Guasch a tanben renovelat los contractes de Benjamin Jullien e Samisoni Langi. S’espèra al mai lèu una decision pel manten dins l’efectiu catalan de l’arrièr Tòni Gigòt.
 
En Elèit 1, Palau remplaça son president sortent per 4 vicepresidents. Limós anóncia l’arribada d’un arrièr australian Zac Santo mas pèrd Thomas Lavesnes que torna a Vilanòva.
 
Carcassona, ont Garry Lo e Tony Tumusa demòran dins l’efectiu, fa signar l’albigés Clamenç Bienès, lo catalan Roman Pallarès, lo lesinhanés (passat per Besièrs XV): Tomàs Malfaz e recupèra Delgado e Artiga a Vilagalhenc-Argon. Rémi Marginet, de retorn d’Anglatèrra, torna a Lesinhan que reçaup lo refòrt del pilar dels Dragonets, Arnaud Barthès.
 
 
NRL: un campionat dobèrt
 
Demòran 6 jornadas de la fasa de classament de jogar en Austràlia (e Nòva Zelanda), fins a la primièra dimenjada de setembre. Es pas aisit de dire, per l’ora, qualas seràn las 8 formacions qualificadas per las pelhòfas.
 
Lo primadièr, la Tempèsta de Melbourne, a perdut sus son terren fàcia a las Aglas de Manly: 11-10.
 
Se Melbourne (32 punts), los Lapinons (28 pts), los Polets e Canberra (26 punts), Manly (24 punts) e Parramatta (22 punts) se deurián qualificar, demòran 7 esquipas que pòdon pretendre als dos darrièrs cadierals: Penrith (20 punts), Brisbane (19 punts), Newcastle, Cronulla e los Tigres (18 punts) e –perqué pas?– los Combatents NZ (17 punts) e los Vaquièrs (16 punts).
 
 
U-17: viatge formator
 
L’esquipa de França dels cabdèts a jogat doas partidas fàcia a sos correspondents angleses. Doas partidas perdudas: 36-12 a Hull e 24-16 a Wakefield, mas portairas d’espèr.
 
 
 
 
Alan Roch