Lo divendres 19 d’abril, se tenguèt a l’Ostal Narbonés una conferéncia interactiva animada pel Joèl Raimondi, representant d’Euroccat (Eurocongrès dels espacis occitan e catalan). Los participants faguèron la constatacion del manten refortit del centralisme francés e un punt sus las iniciativas de la region dicha Occitània en matèria de cooperacion transfrontalièra dempuèi los ans 1980. Atal:

• La CTP (Comunautat de Trabalh dels Pirenèus) recampa 7 regions: Region Occitània, Nòva Aquitània, las comunautats autonòmas d’Euskadi, Navarra, Aragon e Catalonha, mai lo principat d’Andòrra. La CTP definís una estrategia pirenenca. A creat un Observatòri del Clima. Assegura la gestion del POCTÈFA 2021-2027 (programa de cooperacion transfrontalièr França-Espanha-Andòrra que beneficia de 373 millions d’èuros) f

• L’Euroregion Pirenèus-Méditerranèa es una associacion nascuda dins los ans 1990 a l’iniciativa de Jaume Blanc (qu’èra president de Lengadòc-Rosselhon) e Jordi Pujol (alara president de la Generalitat de Catalonha). En 2004, s’i ajustaràn las illas Balearas e Miègjorn-Pirenèus. En 2009, l’Euroregion ven un GECT (Gropament Europèu de Cooperacion Transfrontalièr) en recampant las Balearas, Catalonha e la Region Occitània. Lo sèti es a Perpinhan, animat per un secretari general e une pichona còla.

• L’Arc Latin, fondat en 2002, recampa 59 collectivitats territorialas de las ribas de la Mar Nòstra. L’estructura assegura la gestion del programa MED dotat de 294 milions d’èuros per 10 païses de l’UE, mai 4 en preadesion siá 146 milions de personas ...

Es interessant de notar qu’aquelas organizacions son administradas per d’elegits dels territòris amb de presidéncias que viran (cada 2 ans en principi) e una còla redusida de tecnicians, encargada de la coordinacion dels programas arrestats pels elegits.

Aprèp, los mejans de cada estructura dintran en jòc: la Region Occitània a un budget de 3,55 miliards per 6 millions d’estatjants; lo govèrn de las Balearas a un budget de 7,32 milliards per 1,8 million d’estatjants; Catalonha compta sus 38 miliards per 8 milions d’estatjants. (En comparason, lo budget de Ren del Nòrd-Vestfàlia monta a 697 miliards d’èuros per 18 milions d’estatjants).

Los participants a la discussion anoncièron lo vòt d’acabar la revolucion de 1789 per l’espelida d’un estat federator de regions autonòmas e interdependantas. La Confederacion Soïssa foguèt citada en exemple. Dins aquel esperit, l’Union Europèa se poiriá transformar en confederacion. La discussion es dobèrta.

Un novèl collòqui euroregional Agaches

Per clavar l’acamp, Joèl Raimondi faguèt un punt sul programa previst pel segond collòqui euroregional Agaches que se debanarà a Narbona del 27 al 29 de novembre. Una plaça importanta serà presa per l’Amassada Euroregionala dels Joves, los primièrs dos jorns, que se clavaràn per una serada al teatre amb l’Orquestra de Músiques d’Arrel de Catalunya e Laurenç Cavalié.

Lo divendres 29 de novembre, se tendrà, a Narbo-Via, lo collòqui sul tèma “Despassar la frontièra”; una question vista jols angles de l’istòria, las lengas, la cultura, l’educacion, l’economia, lo desvolopament duradís e las institucions (contacte:  joraimondi@orange.fr ) Una multiplicitat de partenaris s’assòcia a l’eveniment. Aurem l’escasença d’i tornar …

Per ne saber mai: AGACHES/REGARDS, actes del collòqui de Narbona del 9 de decembre de 2022. Contribucions recampadas per Alan Alcouffe e Joël Raimondi