Lo temps contunha de jogar un maissant torn al debanament del campionat d’Elèit 1; cal notar la prèissa de las comunas de decretar las pelenas impracticablas. Ça que la, qualques partidas jogadas dins la fanga e jos la pluèja fan partida de la mitologia tretzista. Doncas, pas de Vilanòva-Lesinhan e pas d’Albi-Palau.

Los traucamuralhas de Carcassona
 
La partida contra Limós aviá daissat de traças dins las tropas carcassonesas: nafrats, suspension,... Es una esquipa jove que se presentèt sus la pelena de Sant Estève fàcia als Dragonets. Lo primièr temps foguèt equilibrat. 12-12 a la 39a, quand una contrataca catalana se clavava per un ensag a qualques segondas de la còrna: 18-12 pels Sang e Aur. Los catalans marquèron tornar a la represa per portar l’avantatge a 24-12. Mas los Canaris se metèron a desplaçar la pauma al maximum, a la far córrer. L’opcion paguèt e menèt a la concretizacion de cinc ensages: un vertadièr festenal ofensiu, un plaser e un regal de rugbi! Un moment mai bèl que lo fuòc d’artifici de Ciutat al mes de julh! Los catalans repliquèron tròp tard e daissèron la victòria als occitans: 38-30.
 
De costat de Carcassona, se lo jove Kevin Benet marquèt lo primièr ensag, los autres 6 son l’òbra dels estrangièrs: 3 pel papó Garry Lo e 3 pel jove arrièr australian Tony Pellow que portava pel primièr còp lo malhòt jaune e negre! Aquò promet per la seguida.
 
Dimenge, a Limós, lo primièr temps foguèt equilibrat entre los locals e los Orses de Sent Gaudenç: 6-6 a la pausa; mas dins lo segond temps, se vegèt una sola esquipa sus la pelena: los primadièrs limosencs que trauquèron tròp aisidament la defensa pirenenca: 50-12 al final.
 
A Tolosa, los avinhonencs s’impausan largament: 56-10.
 
Dissabte, Carcassona reçauprà Albi. Los Dragonets, qu’an ja perdut sus lor pelena contra Lesinhan e Carcassona, reçaupràn la tresena formacion audenca: Limós; Lesinhan pòt legitimament pretendre a la victòria a St Gaudenç. Son tanben al programa  doas partidas equilibradas: Avinhon-Vilanòva e Palau-Tolosa.
 
 
Primièr torn de la Copa Aillères
 
Qualques formacions d’Elèit 2 èran engatjadas dins los quarts de la Copa de la categoria. Se qualifiquèron per las mièjas finalas: Vilagalhenc-Argon (victòria a Lion: 44-8), Carpentràs (42-12, fàcia a Tolon) e Entraigas (24-14 fàcia a Selon). Lo quatren rescontre Vilafranca-Pià se jogarà a una autra data.
 
 
Los Dragons en cèrca de moneda a París
 
Los dirigents dels Dragons catalans èran aqueste dijòus a París. Remetèron un malhòt a l’ambaissador d’Austràlia que prometèt de venir véser la partida contra Toronto aprèp aver recscontrat los australians de Catalonha Nòrd. Rendètz-vos puèi a la BPI (Banca Publica d’Investiment) en cèrca de novèls partenaris financièrs del club, çò rapòrta L'Indépendant.
 
 
Lo capitani Casty e l’australian Maloney participavan a l’expedicion e rescontrèron los clubs e los joves tretzistas de la region parisenca.
 
La Superliga pensa d’organizar una Dimenjada Magica dins la capitala francesa dins las annadas venentas. Perqué pas tre 2021?
 
 
XIII e cultura occitana
 
Es aqueste dimars 17 de decembre, a l’Ostal de Cabardés d’Argon, que l’associacion Fasètz la Lenga en Cabardés tendrà son Estanquet mesadièr, un moment de rescontre en occitan sus de subjèctes divèrses. Lo tèma de l’acamp serà aqueste còp: “los ligams entre lo rugbi de 13 e la cultura occitana”. Animaràn la discussion quatre personas implicadas dins lo XIII e dins la promocion de la lenga e del territòri occitans: Fabiana Albèrt, Joan-Francés Albèrt, Miquèl Roanet (vinhairon e copresident de Vilagalhenc-Argon) e tanben vòstre cronicaire. Un sopar amical (tripas al menut) seguirà lo temps d’escambis.
 
 
 
 
Alan Roch