Lo govèrn francés vòl privatizar l’ofici public encargat dels bòsques (ONF segon sa sigla en francés), çò revèla una informacion publicada per Reporterre. Los agents d’aquel establiment public de portada estatala encargat de la gestion dels bòsques publics poirián èsser de mai en mai de drech privat, una mesura que segon lo quotidian de l’ecologia poiriá afeblir la proteccion dels bòsques.
 
Dimècres passat, 22 de genièr, se tenguèt un rescontre entre la direccion generala de l’ONF e las organizacions sindicalas que representan lo personal de drech public. Pendent aquela reünion s’expliquèt als sindicalistas que lo govèrn presentariá en Conselh de ministres en febrièr venent un projècte de lei d’abilitacion sus “la modernizacion de la foncion publica”. Un còp votada aquela lei, lo govèrn poiriá prene de mesuras per ordenança dins un relambi d’un an. Pel sindicat Fòrça Obrièra (FO), “las consequéncias poirián èsser dramaticas” e “confirmarián lo procès de privatizacion en cors”.
 
Dempuèi plusors annadas, l’ONF patís un desmantelament progressiu, se prenèm en compte qu’en 1985 aviá 15 000 salariats dels quals ara ne rèsta mens de 9000. Reporterre rapòrta que de nombroses gardabòsques denóncian una gestion productivista de cort tèrme que transforma los bòsques publics en “usinas de fusta”.
 
La setmana que ven, s’organizarà d’assembladas generalas de trabalhadors per decidir d’accions de prene, coma una cauma eventuala. De son costat, Reporterre a ensajat de contactar la direccion e lo servici de premsa de l’ONF mas a pas obtengut ges de responsa. S’es publicat sonque un comunicat de premsa qu’oficializa lo ganhant del concors del pus bèl arbre de l’an 2019, un vièlh casse de Tombabuèu, en Naut Agenés, qu’a daverat lo prèmi de la jurada, e un polit fai de Sorese, en Lauragués, qu’a obtengut lo prèmi del public.