Lo Barrut es a mand de publicar un nòu album e son a trabalhar lor espectacle novèl a son entorn. Lo CD fisic serà disponible tre la rintrada mas la sortida oficiala se’n farà a l’entorn de febrièr.
 
La redaccion de Jornalet a agut accès als primièrs enregistraments d’aqueste nòu album. L’impression qu’avèm es d’una evolucion enòrma devèrs lo tractament de la polifonia tradicionala dins una sonoritat fòrça plena. Lo repertòri presenta una varietat de tèmas, de ritmes e de tecnicas que tresmuda cada cançon en un univèrs diferent. Sens cap de dobte, aquel trabalh serà una òbra mèstra qu’al còr montpelhierenc li costarà de superar.
 
Lo Barrut  es una formacion vocala que prepausa un repertòri de composicions originalas en occitan dins l’estil de las polifonias ancestralas del país, amb de tecnicas tradicionalas de pertot, refortidas amb de percussions.