Actualitats
An publicat d’enregistraments que demòstran que Mikel Zabalza moriguèt mentre que lo torturavan
En 1985, trobèron mòrt un menaire d’autobús al Bascoat, qualques jorns après que foguèt detengut dins una operacion antiterrorista. Ara, un jornal difusa un enregistrament que fa partida d’un documentari que se presentarà divendres
Divendres que ven, se projectarà en primièra lo documentari basco Non dago Mikel? (Ont es Mikel?) a prepaus de la mòrt de Mikel Zabalza, un menaire d’autobús basco que foguèt detengut dins una operacion antiterrorista en novembre de 1985, e que descobriguèron mòrt 19 jorns puèi dins lo flume Bidasoa. Ièr, lo jornal Público, publiquèt un enregistrament que demòstra que Zabalza moriguèt dins una casèrna de la Gàrdia Civila mentre que lo torturavan per l’interrogar.
Dins la matinada del 26 de novembre de 1985, la Gàrdia Civila arrestèt lo menaire d’autobuses basco Mikel Zabalza. Durant aquela meteissa operacion detenguèron tanben sa calinhaira, un cosin e dos de sos fraires. Totes foguèron menats e isolats, segon la lei antiterrorista, dins la casèrna d’Intxaurrondo, près de Sant Sebastian. Dins los jorns seguents, los detenguts foguèron meses en libertat, mas non pas Mikel Zabalza, que lo 15 de decembre trobèron mòrt dins lo flume Bidasoa. Aquel fach esmoguèt tot lo Bascoat.
Aqueste dimars passat, lo jornal Público a difusat un enregistrament àudio d’una convèrsa entre l’èx-coronèl del Centre Superior d’Informacion de la Defensa (CSID), Luis Alberto Perote, e lo capitani de la Gàrdia Civila Pedro Gómez Nieto, que demòstra que Zabalza foguèt torturat fins a ne morir.
L’enregistrament se trobèt dins la cellula de Juan Alberto Perote, que foguèt encarcerat per aver enregistrat illegalament de convèrsas entre los ans 1983 e 1991. L’àudio fa partida del filme documentari Non dago Mikel? (Ont es en Mikel?) dels realizaires Miguel Ángel Llamas e Amaia Merino, que divendres que ven arribarà als cinèmas
Vaquí la transcripcion:
Pedro Gómez Nieto: —Òc, fòrça.
Perote: —N’as parlat amb Felipe e los autres?
Gómez Nieto: —Non, o ai pas fach. Ieu… en fasent un jutjament rapid, cresi qu’aguèron la man lèsta, que l’an perdut durant l’interrogatòri.
Perote: — Tu creses que moriguèt dins Intxaurrondo?
Gómez Nieto: —Òc, mon impression es que foguèt pendent l’interrogatòri. Probable per un arrèst cardiac a causa del sac sul cap. Es mon impression. Se cometèt fòrça errors. L’interrogavan e i aviá sos parents dins la cambra d'a costat… Cresi qu’es, car lo mètge disiá qu’aviá una marrida santat, qu’aviá agudas tres intervencions cirurgicalas l’an passat, Zabalza. E “la Maire” ditz que lo vegèt amb la cagola e, bon, cresi que sa vida lor a passat per malha. A nosautres manquèt de nos passar per malha la vida de l’herrialde buru, lo cap dels comandos qu’intervenguèt dins la mòrt del capitani Martín Barrios, manquèt de nos passar per malha al capitani Pindado e a ieu.
Perote: — Amb la cagola.
Gómez Nieto: — Sa vida manquèt de nos passar per malha.
Perote: — Engolissiá la cagola?
Gómez Nieto: —Non, non. Arriba un moment qu’es a respirar son pròpri monoxid de carbòni, alavetz s’estofa, s’estofa… los esfintèrs se dobrisson, e lo tipe s’estofa. E mai nos agacha, perque l’important de l’afar non es pas qu’el i veja pas res, perque tot comptat e rebatut es coma se foguèsse immergit dins sa pensada, mas la cagola deu èsser transparenta per qu’el veja la vida e la sensacion de mòrt que li arriba…
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Pitaluga as tota la raçon del mond. Lo PSOE non fot res per levar la lei mordala ni ajuda a que los rapers pugan dir tot lo que vulgan. Non aprofitan lo temps, coma s' aguessen de governar per sempre. Massa pauc coratge e molta paur, aissò son, uns cagats.
Cal d'annadas de temps e un amolonament de pròvas per far conéisser çò que los dirigents espanhòls sabon dempuèi la debuta : que La polícia de la sembla democracia tortura abans de tuar.
Mentretant, los assassins de basques, catalans, valencians O AUTRES se passèjan per carrièra o morisson dins lor lièch en avent gardat lors primas per servici renduts a l'Estat coma Antonio Gonzalez Pacheco, escaissat "Billy el Niño.
Mentretant, los condemnats per corrupcion, coma l'ancian ministre e ex-banquièr Rodrigo Rato, veson lor pena de preson redusida e son meses en libertat.
Mentretant, al parlament espanhòl, un còp de mai, lo PSOE s'aliga a la drecha dura (PP e Ciudadanos) per refusar de levar l'immunitat a l'ex-rei, bandit, fugitiu de la justícia amb la complicitat totjorn de la polícia d'Estat, e de traire lo delicte d'injurias a la Corona qu'empacha de dire o de cantar las 4 vertats sul rei actual (la nomenada "ley mordaza", o lei badalhon).
adichatz.. une petite réflexion. En général tout ce qui peut toucher à la ""politique", Internacionalisme. ,lutte des classes et affrontement social contre. le capital ,n'a pas "l'air d'intéresser la mouvance occitaniste dont je suis.. Et je trouves ça grave!! l'ennemi de la franchouille doit rigoler et nous ralaienvoi à juste des" folkloriques" .N.NOUS NE LUI FAISONS PAS PEUR... Copem lo cap au Capitau!! alan
Plan fach ! Aquels faissistas bascs que nos vòlon raubar Baiona e que dison qu'es pas una vila occitana an çò que meritan. Osca a la poliça espanhòla !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari