La justícia espanhòla a ordenat lo barrament de la revista Kalera  Info e del sit web d’informacions Kalera Kalera. Es l’Audiéncia Nacionala espanhòla, un tribunal d’excepcion especializat en crimes e delictes de terrorisme, que n’a ordenat lo barrament en seguida d’un rapòrt de la Gàrdia Civila que n’acusa los editors d’“exaltacion del terrorisme”.
 
La revista Kalera Info e son sit web d’informacions se consagran a informar suls presonièrs bascos e lor situacion dins las presons. Fins ara se n’es publicat sètze numèros amb de nòvas, reportatges e analisis sus los presonièrs, las resolucions judiciàrias e las politicas penitenciàrias. Kalera Info e Kalera Kalera son restacats al partit politic Sortu, que sos avocats an anonciat que depausarián un recors contra l’òrdre de barrament.
 
 
La persecucion dels mèdias basquistas
 
La persecucion de mèdias es un dels biaisses de la repression de l’estat espanhòl contra l’independentisme basco. En 1998 se barrèt lo jornal Egin, un afar qu’a tanben tocat lo jornal Gara.
 
Cinc ans pus tard, barrèron Euskaldunon Egunkaria, un jornal plan reüssit e dels mai objectius de l’epòca. La Gàrdia Civila lo tampèt e ne detenguèt la còla en seguida dels òrdres dels jutges de Madrid. Los jutges se volián assegurar que lo jornal fasiá pas partida de las societats que finançavan ÈTA. Lor calguèt onze ans de fòrça patiment infligit per descobrir que non. Los detenguts denoncièron de torturas.
 
Onze ans après lo barrament d’Euskaldunon Egunkaria, après una tièra de longs jutjaments e encarceracions, los acusats foguèron relaxats e l’afar foguèt archivat. Mas lo jornal aviá desaparegut. Egin tanpauc tornèt pas pus.

 

[AMPLIACIÓN] Sortu advierte de que el cierre de 'Kalera Info' y de la web Kalera Kalera es «un hecho muy grave». «El Estado profundo está arremetiendo contra la actividad comunicativa de un partido político», ha aseverado https://t.co/RfF8Xvht5qpic.twitter.com/1ETxUNshHl — naiz: (@naiz_info) September 22, 2021