La Comission Europèa prepausa de reservar 500 milions d’èuros per finançar de projèctes e donar de facilitats reglamentàrias per que l'indústria europèa de las armas aumente la produccion de municions. L’executiu de l’UE cèrca de respondre aital a l’aument de la demanda de municions e de missils consecutiva a la guèrra d’Ucraïna e a l’armament de sos estats membres.

A mai, lo plan de Brussèlas compren tanben un mecanisme per anticipar de blocatges dins la produccion e establís de mesuras d’emergéncia per afrontar la crisi en l’ofèrta de municions.

Los 500 milions d’èuros provenon del Fons Europèu de la Defensa e del futur esplech per la crompa conjoncha d’armament (EDIRPA).

La Comission Europèa met tanben sus la taula de cambiaments de reglaments, coma per exemple poder exigir que las entrepresas accèpten o priorizen la comanda d’un produch critic o que justifiquen perqué refusarián una comanda. Las dichas comandas prioritàrias demoraràn establidas dins una lista de produches de defensa considerats coma critics.