Bandièra01 1180x150: Comuna de Tolosa

Actualitats

Estonament en Venèt pel succès de la consulta independentista

Impulsada per de grops extraparlamentaris, i participèt lo 73% del cens electoral e l’89% votèt de òc

Lo plebiscit numeric que qualques grops independentistas venèts organizèron la setmana passada s’acabaèt divendres passat amb unes resultats estonants e favorables a l’independéncia. Segon las donadas del Corriere, votèron lo 73% dels electors, çò es 2 360 235 ciutadans, dont l’89% diguèron de òc a l’independéncia de Venèt. Solament lo 10,9% votèron contra.
 
Segon aquelas donadas, que qualques mèdias metèron en causa per la manca de seguretat en lo sistèma de vòte per Internet, lo sosten a l’independéncia supèra fòrça lo nombre de vòtes que recep de costuma la xenofòba Liga Nòrd: aquel partit govèrna lo país e a ensajat de s’apropriar lo vòte independentista. Dins aquel sens cal soslinhar qu’aquel vòte foguèt impulsat per de grops extraparlamentaris.
 
S’agís d’una consulta populara que prepausèt als ciutadans, prèviament enregistrats, de votar se volián recuperar la sobeiranetat de l’anciana Republica de Venècia, desmantelada per Napoleon en 1797, amb una question tan clara coma sa responsa: “Volètz que Venèt venga una republica federala, independenta e sobeirana?” Las responsas possiblas foguèron de “òc” o de “non”. 
 
Lo conselh regional de Venèt aviá pas encara aprovat la convocacion d’un referendum consultatiu, es pr’amor d’aquò que la còla de Plebiscit 2013 organizèt aquel vòte, que segon los organizaires es “complementari” e non pas alternatiu al referendum consultatiu oficial que lo conselh regional deu menar a tèrme. Lo vòte se faguèt per Internet e per las personas qu’avián pas de connexion, l’organizacion prevegèt d’installar d’ordenadors publics.
 
En setembre passat, lo conselh deviá decidir se fasiá la convocacion del referendum, mas la question se poguèt pas votar perque se decidiguèt d’ajornar la decision.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article