Lo Jornalet es un jornal. Es sonque aquò mas a l’encòp es tanben fòrça mai de causas: es un jornal occitan, escrich en occitan, pensat d’un biais occitan e destinat als occitans. Dich d’una autra faiçon, podèm explicar tanben çò qu’es pas lo Jornalet: es pas un jornal d’un partit, es pas sectari, non a pas cap de tòca politica ni a cap de dobla intencion. Lo Jornalet es un jornal que se finançarà amb de publicitat e que serà d’accès gratuit als sieus legeires. Al nivèl lingüistic, es un jornal escrich exclusivament en occitan, dins tota sa varietat dialectala mas en respectant la grafia classica. Aqueste jornal a tres règlas estrategicas: informar, èsser un ponch neuralgic de totas las opinions del país e èsser un nautavotz per las opinions dels legeires.

Lo primièr ponch, aquel d’informar, se satisfarà amb de nòvas e d’entrevistas que se publicaràn cada jorn. L’intencion es de far un jornal occitan e en occitan, ont los occitans se pòscan informar de las nòvas d’Occitània, de la meteissa faiçon qu’un suedés legís un jornal suedés escrich en suedés per s’informar de çò que se passa en Suècia. La tòca del Jornalet es sonque d’informar. Per o far possible, al delà dels fondadors del Jornalet, comptam e esperam comptar amb de collaboradors e d’amics d’en pertot. Esperam que siá un luòc agradiu pels jornalistas occitans, ont poiràn escriure dins la lor lenga en libertat.



Dins l’apartat d’opinion, lo Jornalet a tres braces. Per un costat, l’opinion del jornal serà marcada dins l’editorial, que serà mes a jorn cada dimenge. Ailà i poiretz legir las opinions de la còla del Jornalet per rapòrt als divèrses aspèctes de la vida politica, culturala, economica, sociala o environamentala del país. A mai, poiretz legir una seguida d’opinaires qu’escriuràn regularament d’articles d’opinion exclusius pel Jornalet e que cal mercejar de la fisança qu’an ja mostrat abans lo lançament public d’aqueste jornal. Fin finala, dins lo Jornalet i poiretz trobar los principals blogaires occitans meses a jorn a la minuta. Cal escotar çò que pensa e çò que ditz lo malhum dels blògs, perque son lo pols del país.



Al delà de las informacions e de las opinions, l’importància essenciala del Jornalet son los legeires. Per lor balhar la paraula, lo sit a qualques mecanismes de participacion. Per un costat a lo sondatge de la setmana. A mai, podètz tanben escriure los vòstres comentaris dins totes los articles del jornal. Serà un brave plaser, totjorn dempuèi lo respècte e la tolerància vèrs los autres vejaires. Tanben podètz mandar de fotografias e se farà de concorses regularament ont los legeires poiràn ganhar de prèmis interessants. Encara mai: se poirà mandar de nòvas, amb de fotografias o quines archius jonches que sián, que se publicaràn s’an un interès jornalistic pels legeires. Es plan important d’o far! Lo Jornalet farà conéisser tanben, cada setmana, un grop o pagina de Facebook restacat amb lo país.



I a tanben una seccion que cal plan soslinhar: dins la seccion d’escòla, los escolans e los professors de las escòlas occitanas (publicas o associativas) poiràn mandar de nòvas sus lors activitats, amb de fòtos, de vidèos o d’àudios. Cresèm qu’es bon per la lenga que los escolans e las lors familhas ajan costuma d’escriure e legir en occitan endacòm mai; l’occitan es pas solament una causa de l’escòla, mas una lenga viva. 


Fin finala, per quin dobte o question que siá, vaicí l’adreça e-mail del Jornalet: info@jornalet.com. Se volètz, es possible de venir far una presentacion del projècte dins la vòstra vila, sonque o cal demandar!









​​​​​​​