Bandièra01 1180x150: Comuna de Tolosa

editorial

“Òc pertot”, enfin la dignitat

| Ecran del vidèo d\'Occitània arroja
Un recampament sus la Plaça Clemenceau de Pau marcava ièr dissabte lo començament de la campanha sonada “Òc pertot“ per l’oficializacion e la dignificacion de l’occitan. En seguida, se tenguèt una assemblada per debatre e portar d’idèas, e puèi se clavèt la jornada amb un aperitiu e una serada festiva. La campanha l’a entamenada lo movement occitanista de l’esquèrra revolucionària, Libertat, e revendica per l’occitan las meteissas condicions que las an totas las lengas que vivon dins de circonstàncias normalas: assegurar los mejans necessaris per que totòm aja drech de conéisser e d’emplegar, se vòl, la lenga del país al país a l’ora d’estudiar, de trabalhar, de comunicar amb l’administracion e de far sa vida vidanta amb dignitat.
 
La campanha cèrca de far pression suls elegits del temps que prevei un acamp mesadièr a Pau. An lançada una peticion sus change.org e son a distribuir d’afichas e pegasolets, amb de revendicacions netas e claras. “Òc pertot” se presentèt fa qualques jorns dins una conferéncia de premsa fòrça ben argumentada. Lo correspondent dossièr de premsa (que podètz descargar aquí) expausa las rasons per las qualas s’es aviada la campanha, explica l’estrambòrd de la reconquista de la lenga, lo mesprètz de l’estat francés e de sas administracions, detalha la campanha e ne precisa las revendicacions.
 
Al delà de las revendicacions lingüisticas, “Òc pertot” reclama que l’ensenhament de l’istòria dins totes los cursus publics e privats siá la del territòri occitan. Vaquí una revendicacion primordiala, se prenèm en compte la manipòla de l’istòria oficiala que se fa totjorn en França per justificar lo supremacisme lingüistic e cultural que nos a menat a la trista e marrida situacion actuala que volèm revirar.
 
La còla de Libertat fan una crida a totes los collectius que se reconescan dins aquel combat per que jongan la campanha. La còla de Jornalet cresèm que la deurián jónher totes los collectius, associacions, partits e movements de l’occitanisme o per l’ecologia lingüistica. Es una question de dignitat umana.
 
 
 
fffff fffff
 Revendicacions de la campanha “Òc pertot”
 
— L’oficialitat de la lenga occitana e sa preséncia dins l’administracion.
 
— Assegurar los mejans necessaris per que totòm se pòsca exprimir e èsser comprés en occitan dins totas las administracions.
 
— L’ensenhament dins totes los cursus publics e privats.
 
— Que totes los establiments escolars prepausen l’educacion immersiva en occitan.
 
— Que l’ensenhament de l’istòria dins totes los cursus publics e privats siá la del territòri occitan.
 
— L’expression entièra de l’occitan pels arts, per la cultura, pels mèdias....
 
— De quòtas de musica occitana sus las ondas de totas las ràdios qu’emeton sul territòri occitan.
 
— De quòtas d’articles en occitan dins la premsa locala.
 
— La creacion d’una television publica en occitan sus la TNT.
 
— Un canal de television TNT per Òc Tèle.
 
— La senhalizacion de las vilas, vilatges, carrièras, estradas... en occitan.
 
— L’abrogacion de l’article 2 de la Constitucion francesa, que reconeis sonque lo francés coma “lenga de la Republica”.
 
— La ratificacion de la Carta Europèa de las Lengas Regionalas o Minoritàrias.
 
 
   
 

 
 


 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Cairon Florentin d Albigés
10.

#9 Mestreji pas pro los afars de l'ensenhament per aver una idèia clara de çò que cal far,
...... mas per çò qu'es de la segonda part de vòstre comentari, i a un momenton que disi qu'es dins aquel sens que cal anar:

- sens doblidar los qu'an un estacament afectiu a la lenga, pels quals seriá bon de trapar de biaisses novèls per lor donar, amb mai de fòrça, consciencia de l'eritage que pòrtan, e de lor responsabilitat dins la pèrdia d'aquel eritatge...
De monde se bolègan- pensi a totes los que fan de causas sus internet e las rets socialas... mas i a, en mai,benlèu, de causas simplassas que poiriàn far e que fasèm pas....

- e apuèi, coma disètz, es mai que temps de se dobrir a tot aquel monde endralhats dins l'ecologia e la defensa de l'environament, de lor far percebre la proximitat de la culturòdiversitat e de la biòdiversitat e l'importancia, per bastir un monde melhor e equilibrat, d'aparar un e l'autre; que, quand òm estima que cal pensar global per luchar local, se pòt pas daissar de caire un d'aqueles combats, sustot quand òm demòra dins un airal del monde ont una cultura, una lenga son menaçadas, coma aicí...
Seriá temps que , luènh dels sòmis fumoses e copats de la realitat, pòsque espelir una mena d'activisme cultural pacific, totjorn a cercar d'accions en rapòrt amb lo nivèl de consciencia del mond, emai siague flac coma o es al jorn d'auèi...

  • 6
  • 0
Uc de la val florida Galhac
9.

Sus la question de l'ensenhament de la lenga, fariá mestier de recampar ensenhaires, elegits, parents, associacions per far un bilanç de la situacion. Es fòrça diferent d'un luòc a un autre! E aprep far de prepausicions realistas que serián sostengudas per tot aquel monde.
Per alarguir la basa sociala de l'occitanisme, cresi que cal prener lo camin de l'ecologia. Pensi que la joinessa s'interessa a las questions de l'environament, a las questions dels territòris, e a çò que pòt far localament... Un moviment ecol'occitan es d'inventar!

  • 2
  • 0
oksitanlaştıramadıklarımızdanmısınız Apraquital, tresena tenda apèi lo tuc còsta lo riu ont se banhan nusas las zègas a negrenuèch
8.

#7

COSSÍ ALARGUIR NÒSTRA BASA SOCIALA :

Es la bona question !

Crèsi que sabem qu'es pas ambe " lo movement occitanista de l’esquèrra revolucionària" que rencreissarem la basa sociala, d'aqui estant que la version exagonala del d'aquòs deu far 1% al pus cap dins las eleccions.

Per las demandas subre estimadas en rapòrt de las posssibilitats nòtras, cal ensatjar de passar pas per un tropelon de badòcs, e far crèire que la piucòta ponds d'iòus d'aur... Amai se òm es d'acòrd ambe las demandas. Sabem ben que son pas realizable.... ara e dins un esvenidor londanh!

  • 7
  • 0
Gerard Cairon Florentin d Albigés
7.

Ai pas enveja de tornar sus çò que d'unes devon considerar coma un repapiatge de mai de vièlh acarnassit, mas o tòrni dire -sens m'esperlongar sus de proposicions o de possibles aisses de reflexion , considerats per mantuns tròp simplasses o ninòis.

Primièr, cossí ésser pas d'acòrdi ambe aquelas revindicacions !
Mas, en facia, de que nos dison ( o nos fan comprene) ! :
" L'Occitanisme, quantes d'electors ?"
Alara, podèm totjorn bramar, capejar e bracejar
- Mentre qu'aurem pas ajuda una reflexion aprigondida sus
COSSÍ ALARGUIR NÒSTRA BASA SOCIALA
.....ambe' ls pauques de mejans qu'avèm
nos caldrà acontentar de demandar en nos aplatussant, per la lenga occitana, l'equivalent en tintins d'una gargolha de "Notre Dame", e encara apuèi de dire " mercés plan!"

  • 6
  • 0
ltrobat
6.

"Que totes los establiments escolars prepausen l’educacion immersiva en occitan."
Que son plan braves los qui perpausan aquò. Quan sabem que, dens lo purmèr grat, que mancan regents entà assegurar l'ensenhament en occitan dens los sitis on existeish, quin pensan trobar los ensenhaires entà perpausar l'ensenhament immersiu dens totas las escòlas??
Qu'ei aisit de manifestar a 4 o 5 en aficar, de faiçon demagogica, objectius maximalistas tot a fèit irrealistas. Mes n'ajuda pas briga a har avançar las causas.

  • 8
  • 3

Escriu un comentari sus aqueste article