Bandièra01 1180x150: Comuna de Tolosa

editorial

Per un jornal participatiu, viu e civilizat

Quand discutissèm amb qualqu’un, emplegam quicòm mai que de paraulas. Las expressions de la cara e los gèstes son fòrça importants per comunicar. Quand parlam al telefòn, nos servissèm tanben de modulacions de la votz per nos exprimir. Pasmens, tot aquel encastre audiovisual existís pas quand comunicam solament a l’escrich e sovent es complicat de transmetre cèrts concèptes o estats d’esperit.
 
Lo mond de Jornalet coneissèm plan aquelas limitacions comunicativas. Aqueste jornal es viu e la comunicacion entre redactors e legeires es fluida gràcias a la participacion del public e las possibilitats de valorizar las informacions e los comentaris. Aquelas dificultats nos an menats, de còps, a de situacions tròp desagradivas que deuriam ensajar d’evitar. Un forum dins lo qual qualques legeires se baton amb de messatges violents provòca de malèsser e la non-participacion de fòrça mond. Per aquela rason, e per poder comunicar recipròcament d’un biais eficaç, la redaccion de Jornalet prepausa qualques conselhs d’etiqueta a sos redactors, a sos opinaires e a sos legeires:
 
— A l’ora d’escriure un comentari, precisatz una adreiça d’e-mail corrècta. La redaccion ensaja de contactar los comentators abans d’eliminar un comentari que considère ofensant, sexista, omofòb, transfòb, racista...
 
— Comptatz totjorn que de l’autre costat de l’ecran i a un èsser uman amb sas idèas e sos sentiments. Escrivètz coma se vos regardèssetz dins los uèlhs. Sètz pregats d’escriure pas res que diriatz pas se foguèssetz en fàcia de l’autra persona.
 
— Ensajatz d’èsser clars, precises e concises. Fòrça malentenduts arriban de comentaris longasses e pauc clars.
 
— Emplegatz d’emoticònas per ajudar a comunicar cèrts sentiments, particularament quand s’agís d’ironia o d’umor.
 
— Sètz pregats d’escriure pas cap de comentari quand seretz emmaliciats o en colèra. Esperatz d’aver un sentiment mai objectiu per exprimir vòstre vejaire.
 
— Publiquetz pas jamai de donadas personalas o privadas de cap d’autra persona. Tot lo mond an drech a lor intimitat.
 
— Las majusculas son sovent interpretadas coma de crits. Sètz pregats de las evitar.
 
— Sètz pregats d’èsser tolerants. Las opinions dels autres son pas que d’opinions e degun es pas pas obligat de las partejar.
 
— Se qualque comentari vos fa sentir mal, sètz pregats de tocar lo boton “comentari inadeqüat” en avertissent la redaccion de Jornalet. Se qualque article d’opinion vos fa sentir mal, sètz pregats de contactar la redaccion sul pic.
 
— Las criticas e los desacòrdis, val mai de los exprimir en privat. Lo sit prepausa un boton per contactar los autors dels articles d’opinion. Lo podètz tanben emplegar per lor pausar de questions.
 
— Los autors dels articles d’informacion e d’opinion son pregats de respondre pas als comentaris dels legeires. Eles faràn solament servir los comentaris per apondre de mesas a jorn de las informacions publicadas.
 
Esperem que totes aqueles conselhs vos sián utils, e e nos ajudaràn a aver un jornal que contunharà longtemps de mostrar al Mond que l’occitan es una lenga viva, e que sèm un brave pòble.



 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi! 31
11.

Image del monde occitan
Basta de pensar en l'image que bailam del monde occitan, mai que mai les jovents...d'aitant mai que i'a pas un fum de jornals numerics occitans a gratis...

  • 5
  • 0
Professor Lacan Fac de Vincennes d\'endacòm mai
10.

#9 Una plan plan bona analisi del discors lachaudenc e sos milanta gandalhaments tòrts, òsca !

  • 9
  • 1
S. Riconèt
9.

#3 Amb certs (disi plan, CERTS ) comentaris, mon primièr problèma es la manca de coerència, lo rasonament ermetic e sens coa ni tèsta que se perd dins un esmarrador escur, per pas dire mentalament desvariat. Benlèu qu'aquo se sona de poesia ? Anètz saupre !

  • 10
  • 0
Jojo Bressols
8.

#7 *vòu dire

  • 3
  • 0
Jojo Bressols
7.

Òi, mes de fes que i a aquò's ben agradiu de se fotre sul morre en lenga nòstra amb tota la marrida fe dau mond. Vòu que la lenga es pancara mòrta !

  • 8
  • 0

Escriu un comentari sus aqueste article