Bandièra01 1180x150: Comuna de Tolosa

editorial

Las nòstras costumas de consum

| Cellule Communication
La cosina tradicionala occitana es, amb l’italiana, una de las mai conegudas e atrasentas del Mond. Qualques poètas an cantadas las glòrias de cèrts plats tradicionals occitans qu’a l’ora los prepausan los melhors restaurants de tota la planeta, sovent venduts coma se foguèsson franceses. Mas aquela cosina es, sustot, lo resultat d’una sapiéncia populara qu’aviá bastit, long dels sègles, un biais de manjar adaptat al territòri que produsiá d’un biais duradís. Çò qu’ara sonam agricultura bio, e que nos sembla quicòm de car e d’extraordinari, es pas res mai que lo biais tradicional de produire. Quan l’occitan èra la lenga de comunicacion normala e abituala del país nòstre, manjàvem pas que de produches de proximitat produches dins de tenements familials.
 
Dijòus passat, lo grop internacional de scientifics climatics de l’ÒNU faguèt venir public son rapòrt per frenar la crisi climatica sus la Tèrra e recomandava de reduire lo consum de carn car l’elevatge es responsable d’un 23% dels gases d’efièch de sarra. Los scientifics de l’ÒNU nos encoratjan ara a encaminar nòstre sistèma alimentari devèrs una cultura mai duradissa e d’abituds de consum pus sanas. Las marridas costumas de nòstra alimentacion son un grèu problèma del Mond occidental e sa causa principala es l’indústria alimentària que condiciona lo sistèma de produccion e quitament las decisions politicas. Un nombre reduch de societats contraròtla la produccion e la venda d’aliments, amb de campanhas de publicitat que valon de miliards.
 
Dins aquel contèxt, trobam tot plen de dificultats per cambiar nòstras abituds alimentàrias. La carn, tradicionalament presenta d’un biais moderat, se consuma de manièra jornadièra dins la majoritat de las cosinas e dels restaurants. Los que volèm consumar d’un biais ecologic e responsable, e tanben san, devèm despensar plan mai d’argent per manjar, e nos batre contra una societat que nos compren pas. Dins aquel sens, es una batèsta sociala similara a la volontat de parlar occitan en Occitània.
 
Per tant, es evident, qu’al delà de cambiar nòstras costumas de consum, cal un cambiament politic e economic per salvar la planeta de la catastròfa. Dins aquel sens, son los joves los mai mobilizats e engatjats e es gràcias a eles que poirem un jorn reüssir. Nòstres joves son nascuts jos un capitalisme que lor a prepausat sonque d’inegalitats, de precarietat, de marrida santat e de degradacion environamentala. Es la mobilizacion dels joves pel clima que nos prepausa lo debat sus d’estrategias revolucionàrias per metre lo ponch final a aqueste capitalisme desfrenat que nos destrutz.

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Padenon
5.

Ieu soi content que los restaurants prepausen los plats tradicionals occitans a l'ora, recalfats son pas tan bons.

  • 1
  • 0
Pierre Terral
4.

La solucion es dins lo problème. Per far contra a l'explosion demografica que menaça la planeta cal manjar mai de carn e non pas mens : cal legalisar lo cannibalisme ! :-D

  • 3
  • 13
Mèfi! 31
3.

Las costumas de consum son estrèitament ligadas al nivèll de consum e per aital al de revengut.
Le póder de compra val póder de degalh ecologic, e cambiar de costumas desplaçarà le problèma endacòm mai, emai le nivèll de revengut permetèsse de consumir mai ecologicament.
De grat o de fòrça un retorn en rèire es prevesible, en començant ambe les mai paures, païses e classes socialas, segond la lèi del mai fòrt. Tot aquò promet quecòm de rudde...

  • 5
  • 0
Apolonia Rome
2.

"Nòstres joves son nascuts jos un capitalisme que lor a prepausat sonque d’inegalitats, de precarietat, de marrida santat e de degradacion environamentala"

Lor avèm daissat una mèrda de monde, e o planhon. Mas fèm pas res per n'assumir la responsabilitat e o adobar. Al contrari, los desautorizam e no'n trufam d'eles.

  • 10
  • 3
Papioli
1.

Los jòunes an pas lo poder de nos sauvar; los autres an pas lo poder de nos sauvar. Nos sem sols per saber çò que devam minjar.
Quò es pus la societat tradicionala que fai la cosina mas quò es las multinacionalas.
Quò fai tota la differença; sem devenguts consomators e dependent de la cosina de l'ONU que repren una propaganda que sert las multinacionalas pas l'autonomia de las contradas.

  • 8
  • 1

Escriu un comentari sus aqueste article