Bandièra01 1180x150: Comuna de Tolosa

editorial

Fàcia a l’exterminacion, reclamam lo drech d’èsser

Bearn 1992
Bearn 1992

Tèxte legit

Cada jorn es mai evident que França es pas res mai qu’una immensa preson de pòbles e de nacions. Los arguments cinics amb los quals perfuman l’exterminacion de tota lenga e tota cultura autra que la francesa son de mens en mens credibles. Se qualqu’un cresiá encara que l’article 2 de lor Constitucion cercava de combatre los anglicismes e que la reforma Blanquer aviá per tòca un melhorament del sistèma educatiu, las manòbras del jacobinisme per tombar la Lei Molac an mes en evidéncia que, pel jacobinisme, França sap pas existir ni viure amb sa diversitat, que son existéncia postula l’exterminacion de tota autra lenga e cultura, de tot autre pòble. França es totjorn aquel ancian regim uniformizaire qu’es vengut l’excepcion mondiala.
 
Desenant, nos cal sosténer mai que jamai lo deputat breton Paul Molac, qu’a tengut la constància, la paciéncia, la coeréncia e la determinacion necessàrias per arribar a un eveniment istoric: que l’Assemblada Nacionala francesa aprovèsse una lei de proteccion e promocion de las lengas minorizadas. El comptèt sul sosten de las associacions de defensa de las lengas nòstras e ara i deu encara comptar dins sa denóncia del jacobinisme e dins son combat contra l’article 2 de la Constitucion.
 
Tanben nos cal aprofechar d’a fons las possibilitats que las nos prepausan las bricas que nos an daissadas los “mossurs” del Conselh Constitucional. A l’ora d’ara, la lei sèrva de mesuras importantas que poirián permetre d’avançadas coma la senhaletica e l’afichatge en occitan, l’encoratjament de la lenga nòstra dins las escòlas publicas, las ajudas als enfants que van dins una escòla fòra de lor comuna de residéncia.
 
Mas sustot se cal mobilizar per denonciar al Mond entièr, al país e fòra del país, que l’estat que se vanta d’èsser pionièr dels dreches de l’òme nos permet pas d’existir. Cal que lo Mond entièr sàpia que nòstres enfants se pòdon pas apelar Anaís o Jòrdi, que los enfants de nòstres amics bascos, bretons e catalans se pòdon pas apelar Iñaki, Fañch o Martí. Cal que lo Mond entièr sàpia que l’occitan es una lenga e una cultura millenària en perilh d’extincion, qu’es una cultura d’inclusion e de convivéncia que vòl viure dins un encastre plural sens èsser exterminada per una cultura d’exclusion e d’intolerància. Ne cal assabentar totes los organismes de defensa dels dreches umans de la planeta.
 
Dissabte 29 de mai, son convocadas de manifestacions per tot l’estat francés per defendre la lei de proteccion e promocion de las lengas minorizadas. E mai las decisions del Conselh Constitucional sián definitivas, se cal mobilizar, ara mai que jamai, pel drech d’èsser. En Occitània las manifestacions son previstas a Albi, a Clarmont-Ferrand, a Carcassona e tanben a Pradèlas en Val (Corbièras) e Somèire (Garrigas) dins l’encastre del Total Festum.


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
13.

#11
Mièlhs qu'aquò !
Le Monde "jornal de referéncia", faguèt mièlhs que le policia que comptava 25 000 participants : 20 000 per Le Monde, quand se sap que las chifras de la polícia son torjorn las mai bassas per las manifestacions.
Es coma los nafrats de la repression en Catalonha. Le Monde mantenguèt la chifra de 87 nafrats quand los espitals n'arribèrona mai de 800, chifras publicadas per mantuns jornals en anglés, espanhòl, portugués o italian. Es a dire qu'amagan pas : mentisson !

  • 5
  • 0
Arnaud de Massabrac
12.

#11 Non, se'n fonton pas ! Son contra, cap e tot. Soi nacionalsitas expansionistas franceses. Vòlon erardicar uèit pòbles diferents, definitivament, en eradicant lors lengas. Per fin qu'en França non i aja mai que de franceses parlant francés. E res mai. De tot çò, non se'n foton : combaton, e mai que mai pel mejan del silenci sepulcral.

  • 10
  • 0
Raimon
11.

#2 Quitament s'i a anatz a un milion de manifestants capvath Albi... Los Franceses S'EN FOTEN ! los quite medias de'n primièr parlon pas que de las manifestacions que's debanan a París. Vos soventètz de la manifestacion par l'occitan a Tolosa en 2012 ? polida capitada ! 30 000 personas ! estoc la mai gròssa manifestacion de l'Exagon aqueste jorn ! e be las televisions francesas an focalisat l'actualitat sus la grandassa manifestacion de l'extrèma-esquerra a París que recampava un bon milierat de personas ! pas un mot dins las televisions d'Estat sus la mobilisacion dels Occitans : S'EN FONTEN vos disi ! piri : son causas que vòlen pas veire. I a pas mai òrb que lo que vòl pas veire. Sonque França Tres Tolosa en 2012 que pendent une punhada de secondas evoquèc a las informacions regionalas una mena de carnaval festiu tradicional capvath las carrièras de la ciutat ròsa...

A ! e sustot, lo 20 de junh, oblidètz-pas de votar per un partit francés ! lo CREO vos dirà lo parti que cal votar per que't poscan conservar las tras que magras subvencions... MDR!

  • 9
  • 5
lo grifol es pas agotat, contunha de rajar
10.

Cal far tot è !

https://www.contrepoints.org/2021/05/25/398144-langues-regionales-la-constitution-contre-la-diversite-francaise

  • 0
  • 0
la pòrta se dubrís quand shiulan
9.

Un pichon imatge que pausa la bona question que n'endralha d'autras....e es tota l'istòria....

https://pbs.twimg.com/media/E2Iq9d0WUAA25ID?format=jpg&name=900x900

Los occitans son esperats aperaqui : un imatge

  • 1
  • 0

Escriu un comentari sus aqueste article