Bandièra01 1180x150: Comuna de Tolosa

editorial

La crisi umanitària e las prioritats mediaticas

Fa un pauc mai d’una setmana qu’un vaissèl que transportava de centenas de personas naufraguèt davant las còstas de Peloponès. 104 personas son estadas salvadas e menadas dins lo camp de refugiats de Malakasa, près d’Atenas, ont se tròban encarcerats dins de condicions pietadosas. Lo nombre de victimas lo sabèm pas encara, lo naviri auriá transportadas entre 400 e 750 personas a bòrd segon los testimònis. Se crenh que lo nombre de mòrts siá de qualques centenas mas per ara an recuperats 81 cadavres. Las familhas son totjorn dins l’espèr de trobar de subrevivents.

En seguida d’aquesta enòrma tragèdia, l’Organizacion Internacionala per las Migracions (OIM) e lo Naut Comissiariat de las Nacions Unidas pels Refugiats (NACNUR) reclaman d’accions urgentas e decisivas per empachar d’autres mòrts en Mediterranèa, qu’es un enòrme cementèri de desenas de milièrs de cadavres de personas que fugisson la misèria, lo talent, la set, la guèrra o la repression. Dins aquel sens, l’OIM e lo NACNUR an remembrat que la recèrca e lo salvament en nauta mar son un imperatiu umanitari.

Un imperatiu umanitari que los mèdias e los govèrns occidentals si que l’an plan comprés en çò que tanh al Titan, un vaissèl sosmarin desaparegut al fons de l’ocean Atlantic mentre qu’explorava las rèstas del Titanic. Dedins se trobava lo pilòt e quatre passatgièrs qu’avián pagats 250 000 dolars per l’aventura. Planhèm e ploram la tragèdia del Titan mas nos sentèm fòrça desconcertats de l’operacion mediatica e de salvament de portada internacionala que s’entamenèt mentre que los 104 subrevivents de la tragèdia de Kalamata se trobavan embarrats dins un camp sens psicològs ni traductors e que de centenas de naufragièrs son totjorn considerats desapareguts.

Aquela situacion nos deu far soscar prigondament sus las valors de nòstra societat. Podèm pas permetre que las personas en situacion de vulnerabilitat que riscan lors vidas, forçadas de migrar, sián mespresadas d’aquel biais. Per tant, fasèm una crida als estats, als govèrns e a la societat a una accion umanitària immediata. Es imperatiu que s'assigne de ressorsas per salvar, ajudar e protegir los que pòdon morir sus las rotas migratòrias perilhosas. Nos cal demandar çò que los a forçats de quitar lors païses e qui tira profièch de lor malastre. A mai, volèm tanben condemnar l’apròchi mediatic que valoriza mai las istòrias sensacionalistas que las crisis umanitàrias realas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jordi Caldentey Manacor (Malhòrca)
1.

Lo catalan modèrn, quand a doas opcions gramaticalas parièras de corrèctas, escuelh totjorn, totjorn, totjorn, la que se sembla mai a l'espanhòl. Pr'amor d'aquò, lo catalan modèrn a pas de sintaxi pròpria.

Per tal d'evitar que passe aquò meteis amb l'occitan, prepausi que, quand i a doas opcions parièras de corrèctas, escuelhèm la que se diferéncia mai del francés e pas la que s'i sembla mai.

Pr'amor que Lois Alibert admet dins sa Gramatica Occitana coma corrècte que i aja acòrdi (e tanben que no n'hi aja pas) entre lo genre e lo nombre del participi passat amb l'objècte dirècte, doncas, vos feliciti per aver escrich 'lo naviri auriá TRANSPORTADAS (e pas "transportat") entre 400 e 750 personas'; Vos feliciti per aver escrich 'per ara an RECUPERATS (e pas "recuperat") 81 cadavres'; E vos feliciti tanben per aver escrich 'Dedins se trobava lo pilòt e quatre passatgièrs qu’avián PAGATS (e pas "pagat") 250 000 dolars per l’aventura.'

  • 3
  • 4

Escriu un comentari sus aqueste article