editorial
Jornalet contunharà en 2024
Lo 27 d'agost passat, anonciàvem amb resignacion que Jornalet intrariá en “ibernacion” a comptar del 1r de genièr de 2024, a causa de nòstra lassièra après 12 ans de trabalh sens ressorsas. Totun, la reaccion de qualques legeires es estada extraordinària. Aquestas darrièras setmanas, avèm recebuts de messatges de sosten, d’idèas e de proposicions inspirairas que nos an encoratjats a tornar pensar aquela decision. De soslinhar lo trabalh d’analisi e reflexion qu’avèm menat a bon tèrme gràcias a l’ajuda d’un legeire especializat en la gestion de risques.
Una de las conclusions tiradas d’aquelas analisis es qu’un periòde d’ibernacion fariá venir mai complicat lo prètzfach de cercar de ressorsas per reviudar lo quotidian en linha. Per ara, s’avèm pas trobats de novèlas ressorsas, ni financièras ni umanas, mas avèm definits los prètzfaches essencials, los mejans indispensables per la continuitat e la còla necessària per contunhar en 2024.
Se doncas sèm totjorn a cercar de novèls benevòls e ressorsas per la còla, sens saber se capitarem ben e aurem enfin un jornal digne gràcias a un finançament digne o se sèm sonque a perennizar l’agonia, ça que la, inspirats pel sosten extraordinari de qualques legeires e pel vam de la còla, avèm tornarmai decidit d’o ensajar. Tant que i a de vida i a d’espèr, e esperança fa viure.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Desvoloparai mon punt de vista dins un Papieròt venent del dijòus. A lèu…
M’es que son causas disparièras que non se pòdon comparar, l’emmòtle es disparièr.
1- La premsa francimanda n’ i a a roncéncia, podes causir .
2- Lo francés es brica una lenga combatuda e minorizada.
3- Lo nombre d’article dins las premsas regionalas a res a vèire ambe lo nombre d’articles dins jornalet.
4- La premsa Occitana , tirat jornalet, n’ i a pas !
5- Jornalet deu èsser un imatge del pòble occitan e deurià revertar aquela diversitat.
6- L’occitan es lenga combatuda, « minorizada » es lo resultat de lenga combatuda
7- L’us de l’Occitan demesís de mai en mai dins tot l’agre occitan d’un còp èra.
8- Dins totis los paràts los occitans meteis se son traslonhats de lor lenga
9- L’Aprendissatge de l’occitan es a pichona escala e de tot biais los que l’an après parlon brica dins la vida vidanta . (https://www.jornalet.com/opinion/21535/tornar-soscar-lo-project-occitaniste)
10- Per ensatjar de salvar (i crèsi pus) nòstra lenga, cal azemprar, recampar mond, de mond desvariats, que pòdon pensar d’un biais disparièr dins mantun domèni, mas qu’an l’amor de lor lenga e que la vèire demesir los punha priu.
Cossi escrivessetz pas d'articles per jornalet ?
Se regaudir que jornalet contunhe deuriá èsser evident per tot promotor de nòstra lenga e de las autras lengas istoricas de l'exagòn…
I a un bèl brieu ara que lo cap redactor me demandèt se poiriái escríver per Jornalet.
Escriure dins un mèdum es s'expausar a la critica sus la faiçon d'escriure, sus la lenga marrida o pas… e ieu malgrat mon occitan de cosina acceptèri unicament per portar ma pèira…
Devi dire que jamai un sol de mos articles es estat modificat, alterat o autre…
Soi pas encartat en cò dels Robespierristas, ni dels independentistas, ni dels frontistas, ni… Devèssi m'encartar ara, seriá dins "lo partit de ne rire"
Ensagi simplament d'ajudar e ai totjorn dich al cap redactor en enviant ma cronica : se t'agrada, tan melhor, senon, copa, trenca, escampa…
Lo pauc que sabi far, o fau e se n'i a que son pas contents, coma disiá mon grand, que lo cuol lor pèle !
Osca, òsca e mercé a Ferriòl e a tota la còla de Jornalet ! Per afortir lo desvolopament d'una lenga e d'una cultura occitanas vivas e ricas a l'encòp de son unitat e de sa diversitat e tanben per bastir e afortir una comunautat occitana ela pereu viva e rica de son unitat e de sa diversitat, Jornalet fai mestièr en cadun e caduna de sei legeires d'uei e de deman. Emai d'unei aguesson d'avejaires contraris me pensi que çò qu'es bòn per Jornalet es bòn tot l'occitanisme. A n'aquelei que li agrada pas la linha editoriala de Jornalet li demandi quand legissetz lo vòstre jornau regionau e que çò que ditz vos desagrada li demandatz de cambiar sa linha editoriala ò li mandatz vòstre punt de vista?
Vesi de legeires que repotegan del costat tròp esquerrista del Jornalet mas s’enganan de ràbia…
La solucion es pas de cambiar la linha editoriala de Jornalet o del Figaro o Liberation mas puslèu qu’en Occitania tota i aja mai d’un jornal amb d’autres sensibilitats : centre ; centre dreita ; dreita etc…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari