Bandièra01 1180x150: Comuna de Tolosa

editorial

Los Amics de Jornalet

| Ganesha Isis
Fa qualques jorns publicàvem lo primièr bilanç annual de l’associacion Los Amics del Jornalet. Coma probablament ja sabètz, aquela associacion legalizada dins la Republica Francesa e nascuda al marge de Jornalet, a per tòca de sosténer, dins sas possibilitats, lo Jornalet al nivèl economic. Los aperaquí 50 sòcis pagan 20 èuros per an, qu’arriban gaireben totes a aqueste jornal numeric qu’ara sètz a legir. La quantitat es fòrça petita, gaireben simbolica. Que son 20 èuros, uèi? Lo prètz d’una bilheta pel cinèma e un entrepan? Lo prètz d’un libre? Lo còst de doas camisetas? Es cèrtament un còst plan petit per sosténer un jornal en lenga occitana. Es un prètz que la majoritat dels legeires pòdon pagar sens cap de problèma, en prenent en compte que se paga solament un còp per an.
 
Es pr’amor d’aquò que volèm far una crida a d’autres ciutadans occitans a jónher l’associacion dels Amics de Jornalet. Es vertat, e o avèm ja explicat, que lo finançament del jornal se basa sus la publicitat (institucionala o privada), mas es pas un secret que la crisi a provocat una baissa dins aquel domeni e de grèus retards de pagaments. Coma aquò, ara qu’avèm a pena dos ans e mièg de vida, l’accion dels Amics de Jornalet nos ajuda a pagar una partida dels còstes estructurals e tecnics d’aqueste jornal. Los volèm mercejar, encara un còp, de tot còr.
 
Ça que la, i a quicòm que volèm precisar ben: lo jornal que sètz a legir quitarà pas d’aparéisser cada jorn amb d’articles nòus e de nòvas opinions e quitarà pas d’èsser d’accès gratuit. O avèm ja escrich d’autres còps: la lenga occitana e l’espaci occitan de comunicacion son tròp fragils, a l’ora d’ara, e i podèm pas metre mai d’obstacles. Ont arribe pas l’argent i metrem mai d’oras panadas a la familha, al sòm e al trabalh. Quitarem pas de pedalar perque senon fariam tombar la bicicleta. Mas vos mercejarem plan se fasètz un gèst de solidaritat en tot venir sòcis dels Amics de Jornalet.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
13.

#12 E tanben cal saber que PayPal ten un (pichon) còst bancari per l'organisme que recep la moneda.

  • 8
  • 1
Gerard Joan Barceló Pèiralata
12.

#11 Òc, mas avèm una persona qu'a pagat per PayPal en tot demandar d'èsser sòci de l'associacion, e tanben pensam de dobrir nòstre pròpri compte PayPal.

  • 8
  • 1
Lutz
11.

Per los que lor agradariá de sosténer sens aderir a l'associacion, oblidetz pas que jos la meteo, i a un ligam Paypal ! :)

  • 7
  • 0
Gerard Joan Barceló Pèiralata
10.

#9 Òc, la libertat es importanta, es evident, e se seriá pogut imaginar un jornal en linha amb d'articles pagants, mas la redaccion de 'Jornalet' preferís que sián a gratis: aquò val mai per una lenga tròp pauc difusada coma la nòstra.
Quand venguèri a Barcelona en cò de Ferriòl Macip, en març passat, constatèri tot lo trabalh enòrme que consacra a 'Jornalet'. Aquò se pòt pas contar ni imaginar: o cal veire. Son de jornadas, de nuèches...
Doncas, si que la libertat es importanta, mas la solidaritat tanben es necessària.
E lo sens comun: s'ajudam pas 'Jornalet', despareisserà.

  • 17
  • 2
Cristian FORMENT AGEN
9.

#8- Parlavi de grossir(ironicament) ... , e parlavi de libertat(seriosament).
Sus aqueste darrèr punt, èi comprés que no acordam.

  • 1
  • 0

Escriu un comentari sus aqueste article