Puslèu que d’amagar l’occitan, de se fondre dins la massa, l’ai mes endavant, en bon cap d’ase que soi Soi professor en occitan, cantador en occitan, contaire en occitan e foguèri quitament guida de musèu en occitan En vila i a globalament un agach negatiu sus l’occitan. A la campanha, per contra, tròbi que las causas se melhoran, que la vergonha comença de partir Parli l’occitan a mos enfants. Lor maire l’a doncas aprés tanben, a dicha, en immersion

Coma nasquèt l’interès per l’occitan?
 
Soi nascut dins l’occitan. Es quitament ma lenga primièra. La causa se faguèt naturalament. Lo militantisme m’es vengut probable a l’adolescéncia; me trapèri dins un collègi ont se trufavan de ieu per aquò, per jogar de cabreta, etc... E puslèu que de l’amagar, de se fondre dins la massa, l’ai mes endavant, en bon cap d’ase que soi.
 
 
Qu’avètz començat de far?
 
Contavi un pauc a l’adolescéncia mas subretot, a 16 ans, m’impliquèri a Ràdio Occitània, a Tolosa. Faguèri una emission de ràdio pendent d’annadas. Me manca, mas ai pas brica lo temps, ara.
 
 
Viure pas que de l’occitan es possible?
 
Òc, personalament, o ai totjorn fach. Quitament mos pichons mestièrs quand èri estudiant, èran ligats a l’occitan. Soi professor en occitan, cantador en occitan, contaire en occitan e foguèri quitament guida de musèu en occitan. Doncas, òc, clarament, es possible.
 
 
Coma se passan la recepcion, los ressons?
 
Amb lo conte, clarament, lo primièr reflèxe del mond es de se malfisar de l’occitan, de se dire “Anam pas res comprene, serà un daquòs pels vièlhs”. Mas i arribam, e mai es una fiertat d’i arribar.
 
En musica per contra, dins los mitans ont evoluisson Stille Volk e Eydolon, es tot lo contrari: l’occitan es clarament valorizat, e gaireben un argument comercial.
 
 
A cambiat l’image qu’an lo mond —adultes, enfants— de vos, e de l’occitan tanben?
 
Cresi que depend ont. En vila, non, i a globalament un agach negatiu sus l’occitan. A la campanha, per contra, tròbi que las causas se melhoran, que la vergonha comença de partir.
 
 
Avètz de projèctes autres en defòra?
 
Jògui dins un grop de folk/blues que s’apèla Sweet Surrender.
 
 
Cossí se passa la transmission, la visibilitat, la valorizacion e l’utilitat sociala de l’occitan dins vòstre caire?
 
Parli l’occitan a mos enfants. Lor maire l’a doncas aprés tanben, a dicha, en immersion. Dins mon caire, l’occitan es puslèu valorizat (la seccion bilingua de Matabuòu a bona reputacion dins lo barri) e los melenchonistas jacobinasses deurián venir veire la mixitat sociala e etnica que i a dins aquelas classas. Çò qu’es clarament positiu.
 
 
Cossí vesètz vòstra evolucion dins lo mitan occitanista? E l’entorn occitan, cossí s’endeven per vos, en Occitània tot en general e dins vòstra region en particular?
 
Per èsser onèst, fau las causas de mon costat e soi pas implicat dins lo militantisme associatiu. Foguèri benevòl pendent 15 ans a l’Estivada de Rodés e sabi que soi pas fach pel trabalh de còla. Doncas, ajudi pontualament tala o tala accion, fau mos espectacles mas sabi qu’ai pas la disciplina e lo sens del compromés del militantisme associatiu.