La justícia espanhòla a rebutat tornarmai l’extradicion de l’informatician monegasc Hervé Falciani, coma o faguèt en 2013. Los jutges considèran que lo delicte de Falciani, recercat per la justícia de Soïssa, existís pas dins lo còde penal espanhòl e que, de mai, ja foguèt examinat anteriorament.
 
La justícia soïssa acusa Falciani d’aver revelat de miliards de dolars amagats dins aquel país alpenc, gràcias a las donadas confidencialas qu’obtenguèt quand trabalhava a la banca HSBC en Soïssa. S’agís de las donadas de la dicha Lista Falciani o Lista Lagarde, que l’elaborèt un grop d’investigacion ont participèron The Guardian, Le Monde e El Confidencial amb l’ajuda de l’informatician monegasc. La lista publica de milièrs de noms e de comptes de residents dins de païses de tot lo Mond qu’avián anonimament, segon de donadas de 2006 e 2007, mai de 100 miliards de dolars dins la banca soïssa.
 
 
Tot comencèt a Niça per l’accion d’un monegasc
 
Aquelas informacions son fornidas per l’informatician monegasc Hervé Falciani, que dempuèi 2009 collabòra amb la justícia de qualques païses. Trabalhèt al sèti central de la banca HSBC per reorganizar la basa de donadas e ne refortir la seguretat. Aquí descobriguèt unes 130 000 comptes escurs qu’amagavan una enòrma frauda fiscala gaireben dins totes los païses del Mond, dont França, Espanha e Itàlia. Entre 2006 e 2008, cada jorn, Falciani fasiá de còpias secretas d’aqueles movements bancaris en descargant una enòrma basa de donadas dins son ordenador portable. Una informacion que lo podiá far venir un eròi social o lo rei del cantatge.
 
En decembre de 2008, lo detenguèron las autoritats soïssas. Après èsser liberat, se n’anèt a Niça ont lo procuraire, Éric de Montgolfier, remarquèt la portada de las donadas que Falciani aviá amassadas, e aital comencèt l’enquèsta mondiala contra los fraudaires. L’enquèsta a fach recuperar al fisc francés 186 milions d’èuros.
 
 
Un escambi de presonièrs?
 
La justícia soïssa lancèt un mandat d’arrèst internacional de l’an 2008 enlà. En 2012 lo detenguèron a Barcelona. Plaçat en libertat condicionala qualques meses puèi, en 2013 la justícia espanhòla decidiguèt son aquitament e rebutèt lo mandat soís.
 
Installat a Madrid, Falciani foguèt tornarmai detengut en abril de 2018. Se sospiècha que l’estat espanhòl cercariá d’escambiar Falciani contra l’elegida catalana Marta Rovira, exiliada en Soïssa e tanben perseguida per un mandat d’arrèst internacional que la justícia de Soïssa rebutèt del temps que lo govèrn d’aquel país considerava que l’eventuala extradicion de Falciani podiá pas abotir a un escambi de presonièrs.