Bandièra01 1180x150: País Invisible

Actualitats

La Generalitat de Catalonha commemorarà ongan lo desen anniversari de la mòrt de Robèrt Lafont

Es previst de programar d’activitats culturalas, academicas e de divulgacion de la vida e de l’òbra d’aquela figura màger de l’occitanisme

Robèrt Lafont dins los ans 1980
Robèrt Lafont dins los ans 1980 | XDR
Lo govèrn de la Generalitat de Catalonha a aprovat de commemorar lo desen anniversari de la mòrt de Robèrt Lafont. Dins aquel sens, a previst de programar d’activitats culturalas, academicas e de divulgacion de la vida e de l’òbra de Lafont. Per o far, se va constituir un comitat organizaire compausat d’associacions e de personas de tot lo domeni occitan coneisseiras de la figura e l’òbra de l’escrivan, lingüista e politician occitan.
 
Aquela celebracion, que l’anoncièt en octòbre passat la ministra de la cultura de Catalonha, Laura Borràs, dins l’encastre de la remesa del prèmi Robèrt Lafont, ven ara de se concretizar. A aquel moment, Borràs qualifiquèt Lafont coma “er activista qu’avie clar que lengua e construccion sociala e politica e democratica anàven dera man”.
 
Robèrt Lafont foguèt laureat de la Crotz de Sant Jòrdi pel Govèrn de la Generalitat de Catalonha en 1987. Puèi, en 2010, lo govèrn catalan instituiguèt lo prèmi Robèrt Lafont amb la tòca de reconéisser de personas o d’entitats que se sián distinguidas per la defensa, la projeccion e la promocion de la lenga occitana. Dins la darrièra edicion lo guierdon anèt al lingüista alemand, Georg Kremnitz. Los laureats de las autras annadas son estats Pèire Bèc, Felip Gardy, Jacme Taupiac e la Fondacion Musèu Etnologic de la Val d’Aran.
 
Robèrt Lafont es considerat coma una de las pus grandas figuras istoricas de l’occitanisme.  Foguèt un intellectual occitan e pus particularament un lingüista, un escrivan, un istorian, un especialista de la literatura e un teorician politic.
 
Èra maridat amb l’escrivana, traductritz e ensenhaira italiana Fausta Garavini.
 
 


 
Per ne saber mai recomandam de legir:
 
Lenga e nacion: la pensada dinamica de Robèrt Lafont (I) e (II) de Domergue Sumien
 
“Non coneissi degun qu’aja pres la relèva de Robèrt”, entrevista de Fausta Garavini facha per Marçal Girbau.




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Cal començar a omenatjar los escrivant occitans mai destacats, entre los quals hi ha Robert Lafont. Tot es començar, e pauc a pauc anant fasent camin cada vegada de maniera melhor, mai entenedora . Jo legiguet "Tè tu tè ieu"de l'autor e m'agradet molt. Mas tamben legiguet " L'icòna dins l'iscla " d'una ilha que havia patit una ataca nucleara o una causa aital, e non m'agradet gens, una paranoia terribla.

  • 6
  • 0
Jean-Charles Valadier Tolosa
1.

Òsca a la generalitat. Ara cal demandar la meteissa causa a las regions administrativa Occitanie e PACA. Benlėu o pòt faire l'Assembla Occitana. O faire es un acte politic. Un refús de las institutions serià ta bien un acte politic

  • 13
  • 0

Escriu un comentari sus aqueste article