Bandièra01 1180x150: Comuna de Tolosa

Actualitats

Tretzena dimenjada de protèstas dels Gilets Jaunes: un fotograf a perdut una man

L’aprobacion d’una lei que restrenh lo drech de manifestacion e la polemica sus las municions qu’emplega la polícia an pas fach qu’escalfar mai la colèra dels manifestants

| Celine Calau
 
Dins la trezetzena dimenjada de protèstas dels Gilets Jaunes, encara un òme a perdut una man. Se passèt dissabte a París, davant l’Assemblada Nacionala francesa, ont un Gilet Jaune que preniá de fòtos aguèt “quatre dets arrancats” segon la prefectura de polícia. Segon un testimòni mençonat per l’AFP, la nafradura la provoquèt una “granada de desencerclament” lançada per la polícia suls manifestants qu’ensajavan d’enfonzar las palissadas que protegissián la bastissa parlamentària.
 
Segon lo ministèri de l’Interior, an manifestat dins tot l’estat francés 51 400 personas, mas aquelas donadas son mesas en question pel movement dels Gilets Jaunes. Las vilas amb mai de mobilizacions son totjorn Bordèu e Tolosa, mas pereu Montpelhièr e Marselha an viscut d’importantas mobilizacions. Dins la rèsta de l’estat es Bretanha (Nantas, Rene, Brèst, An Oriant) e lo nòrd de França, en particular Caen e Lilla.
 
 
Colèra a Tolosa
 
Tolosa es la vila qu’a amassat mai de protestataris, entre 4000 e 7000 segon las fonts. “Sèm pas lasses”, çò asseguravan mentre que manifestavan lor “colèra” e reclamavan la liberacion de “[lors] presonièrs”.
 
L’aprobacion d’una nòva lei nomenada “antitrencaires”, que restrenh lo drech de manifestacion e la polemica sus las municions qu’emplega la polícia per reprimir los manifestants, sovent amb brutalitat, an pas fach qu’escalfar mai la colèra dels manifestants dins tot l’estat francés. Lo movement esclatèt a causa de la pojada de las taxas suls carburants e sus las veituras, e se manifèsta contra las inegalitats, la davalada del budget dins los domenis de l’educacion, de las pensions e d’autres servicis socials, mentre que totas las taxas montan. La demission de Macron es una de las revendicacions màgers.
 
             
        
    
fffff fffff
 Lo vejaire de Florian Bachelier
 
Lo deputat macronista Florian Bachelier sembla pas esmogut pel manifestant qu’a perdut los quatre dets d’una man. E mai a mes en question que foguèsse un fotograf e a afirmat sus Twitter qu’auriá solament perdut dos dets.
 
Per contra, lo jornalista Cyprien Royer rapòrta a l’AFP que la persona nafrada es “un fotograf Gilet Jaune” que “preniá de fòtos” al moment d’èsser agarrit. En mai d’aquò, la prefectura de polícia de París confirma l’arrancatge de quatre dets d’una man.
 
De veire la fiulada de Bachelier e las responsas dels internautas.
 
 
   

 


abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Non al capitalisme salvatge que mos ven dels ianquis. Non al raubatori dels bancs privats. Non a l'explotacion laborala dels polítics servents dels bancs privats. VISCA LOS GECS JAUNES !

  • 3
  • 1
Black Blòc Joe
2.

« Un manifestant? Un blackbloc pas vraiment photographe »… çò ditz Bachelier ? Li caldriá venir far las manifestacions amb son pòble, aqueste mariòl ! Constatariá :
1) Que los membres dels Black Blòcs manifèstan tanben, e que son donc, manifèstament, d'autentics manifestants.
2) Que los membres dels Black Blòcs son d'èssers umans, explicitament mai umans que las decisions governamentalas ultraliberalas linguïcidas, per exemple.
3) Qu'amb un aparelh de fotografia, los quites membres dels Black Blòcs prendrián de fotografias absoludament vertadièras, e totalament fotograficas.
4) Qu'un membre dels Black Blòcs se riscariá pas jamai a s'embarrassar d'un aparelh fotografic quand li cal aver las mans liuras per poder luchar contra la repression anti-democratica musculada de l'òrdre borgés establit.
5) Que las armas emplegadas jols òrdres cripto-faiscistas del governament actual son fòrça dangierosas per tota la populacion, manifestanta o non.
6) Qu'es pas la pena de plorinejar davant las violéncias dels manifestants quand la politica impausada als pòbles despuèi mai de vint ans es d'una invariabla violéncia ultraliberala, destrusissent una a una totas las conquèstas socialas que costèron mai d'un sègle de luchas socialas a botar en plaça.
7) Que quand es pas mai possible de se deliurar de l'ultraliberalisme per la via electorala (los socialistas essent venguts tanben de dreita ultraliberala), demòra pas mai que l'insurreccion per se'n poder encara esperar deliurar.
8) Que la revolucion qu'a establida la Republica, la que lo F. Bachelier monsureja en se'n fasent valer, s'es pas establida en potonejant umilament las mans dels nòbles que nos trepejavan, mas en fotent lo fòc als sieus palaces e en acortant d'un cap mai d'un adversari de la Revolucion e dels pòbles.

  • 13
  • 2
Pascau Autariba (31)
1.

Aqueste divés, amassada publica dels Gilets Jaunes a la sala Astruga d'Autariba a 20h30 :-)

  • 4
  • 1

Escriu un comentari sus aqueste article