Bandièra01 1180x150: País Invisible

Actualitats

Tarba aculhís uèi una protèsta contra la supression de l’occitan de l’educacion publica

Davant la supression de l’ensenhament de l’occitan, confirmada per las autoritats bigordanas, los ensenhaires cridan a manifestar davant la DSDEN en en bramant fòrt

Tarba aculhís uèi una protèsta contra la supression de l’occitan de l’educacion publica. Los defensors de l'occitan a l'escòla son cridats a 14h per far de rambalh davant la direccion departamentala de l’educacion francesa (DSDEN). La tòca es de far una manifestacion eissordanta en demandant tanben als manifestants de portar tot çò que pòsca far de rambalh.
 
Se la protèsta a luòc dins lo quadre de la mobilizacion permanenta en Occitània tota, davant la menaça de supression de l'occitan de l'educacion publica, cal dire qu’a Tarba, la DASEN respècta pas a l'ora d'ara la convencion estat-region per l'occitan.
 
L'acamp se ten al numèro 13 de la Carrièra G. Manhoac a partir de 14h.
 
 
Confirman la liquidacion de l'occitan en Bigòrra
 
Lo Centre Regional dels Ensenhaires d’Occitan de Tolosa (CRÈO Tolosa), e tanben lo del departament bigordan, an mandat una letra a l'Inspeccion d'Acadèmia de Tarba per denonciar la liquidacion de la lenga nòstra de l'educacion publica. Mentretant, lo comitat tecnic del departament dels Nauts Pirenèus s'amassèt diluns passat e confirmèt la fin d'una politica en favor de l'ensenhament de l'occitan en Bigòrra.
 
 
Lo 20 de març que ven a Ais de Provença
 
Après las reüssidas manifestacions al centre d’Occitània, ara es Provença que protèsta contra la supression de l’occitan de l’educacion publica. Los ensenhaires de la lenga nòstra cridan a la mobilizacion lo dimècres 20 de març que ven a 14h davant lo rectorat d’Ais de Provença.
 
Segon los ensenhaires provençals, la reforma Blanquer a ja agut de repercussions “mortifèras”. Tant l’acadèmia coma lo rectorat e de caps d’establiments an suprimit d’oras e de pòstes. E mai s’atacan tanben a l’educacion primària. En mai d’aquò “l’acadèmia ven de decidir de suprimir un dei pòstes de la Mission Lenga Regionala que dins lo departament, ajuda leis escòlas qu’ensenhan l’occitan dins sa varietat provençala ai pichons”, çò manifèstan los professors d’occitan que cridan a la mobilizacion.
 
Rendètz-vos dimècres 20 de març a 14h davant lo rectorat a Ais de Provença, Plaça de Lucien Paye.
 
 
L’ora es gravissima
 
“L’ora es gravissima”, çò explicava Jornalet lo president del CRÈO Tolosa, Nicolau Rei-Bèthvéder. “Pels provisors de licèu e principals dels collègis nos arriban los messatges del rectorat e del ministèri. Son clars: vòlon chaplar l’occitan en licèu e collègi dins los uèit departaments de l’acadèmia de Tolosa”, una de las onze subdivisions escolaras que cabon en Occitània dins l’estat francés.
 
L’acadèmia de Tolosa a mes fin a la dotacion especifica que finança l’occitan dins los collègis e licèus e daissa sens occitan gaireben 15 000 escolans. Tanben son pertocats una cinquantena d’ensenhaires d’occitan dins l’acadèmia mondina.
 
Dins la rèsta d’Occitània administrada per França, la situacion es pas melhora. Dins las acadèmias de Lemòtges, Clarmont e Grenòble, l’occitan dins los licèus e collègis es anecdotic. A Montpelhièr e Ais, l’occitan a fòrça reculat davant las atacas dels diferents rectors. D’anóncias de barraduras son estadas fachas en Provença ont lo rector se trufa “d’una lenga que se parla pas”. L’explicacion de la fin de l’occitan es lo pretèxt de la reforma Blanquer dels licèus. Lo 60% dels escolans del segondari es dins l’acadèmia de Tolosa.
 
L’occitan es tanben fòrt a Niça, mas patís fòrça la reforma mortifèra dels licèus. Lo quite cònsol màger, Christian Estrosi, a sasit lo ministre de l’educacion francés Jean-Michel Blanquer.
 
La vertat es que i a al Ministèri de l’Educacion de París una volontat evidenta de metre fin a l’ensenhament de la lenga nòstra.
 
 
 

abonar los amics de Jornalet
 
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
13.

#8 Mas avètz remarcat que lo mesadier de la region a inversat la presentacion occitan (o catalan) / francés: Abans semblava que l'original èra en òc et que lo francés èra la revirada pels non occitanofòns; ara sembla que l'original es en francés et l'occitan es pas que la revirada, l'òs de rosegar, qué!

  • 11
  • 0
Pitaluga
12.

#4 Òc,mas l'OPLO es mai mòrta que la mar de Judèa! Levat per encaissar las dardenas pel non-trabalh que fan!

  • 8
  • 0
fancesc palma
11.

Los governs genocidas culturals de París, ignorants e petenistas,continuan amb la destruccion de nostra lenga. Mas non passaran, los criminals de la lenga e la cultura nostra. Cal denunciar a Brusselles lo govern barbar,ciminal del nostre país Occitania.

  • 4
  • 0
Sicart de Maruèjol
10.

#4 Es la republica francimanda de Paris qu'a decidit, planificat e engimbrat l'eradicacion de totas las lengas de l'Exagon per las remplaçar per la lenga de Paris. Aquel genocidi linguistic practicat dempuèi dos sègles amb tota la potencia economica, judiciaria, ideologica..eca...de l'Estat a plan capitat. Lucha de la topina de fèrre contra la topina de tèrra. I-es per pas res aquesta paura topina de tèrra qu'a perdut la guèrra, la cal pas insolentar, pecaire, èra jogat d'abança.
P.S. Pichona e derisoria consolacion, lo francimand dels envaseires vai pas tardar a crebar, escafat per l'englès. E aquo serà que justicia.

  • 18
  • 1
Guilhèm Thomas Tolosa
9.

#3

Lo CREO Tolosa rencontrèt Na Delgà lo 5 de Mars = sul numerò del "Jornal de la Region" per Mars/Avrial distribuït a totes i a quicòm que parla del malcontentament de la region sus la question de la fin dels mejans del rectorat de Tolosa per l'occitan.

Teni pas a la defendre especialament mas cal èsser intellectualament oneste e plan reconéisser qu'aquí Na Delgà es estada plan mai rapida e eficaça que d'unes elegits.

Cal tornar a Cesar çò que li aparten.

  • 1
  • 8

Escriu un comentari sus aqueste article