Bandièra01 1180x150: Comuna de Tolosa

Actualitats

Rugbi de XIII: la metamorfòsi gaujosa dels Dragons

Aqueste dissabte de vèspre, lavassada e solelh bèl se repartiguèron lo temps sus Brutus e la partida entre Dragons e Saint Helens

Lo malhòt dels Dragons per la partida del 18 de mai a Barcelona: blau i grana (blau e granat) coma lo Barça e l’escapulari sang e aur
Lo malhòt dels Dragons per la partida del 18 de mai a Barcelona: blau i grana (blau e granat) coma lo Barça e l’escapulari sang e aur
Coma una flaira d’infèrn pels Sants…
 
D’un costat, los Sants qu’arribavan a Perpinhan sens aver perdut una sola partida. De l’autre, los Dragons dins lo dobte aprèp lo retorn la mala plena de punts (42-0) de Wigan. Dins la setmana, Gigòt suplica l’entraïnaire de lo tornar plaçar a l’arrièr. E McNamara causís la permutacion Gigòt-Tomkins.
 
Per entamenar la partida, un temps anglés que se cobrís encara mai amb un primièr ensag anglés, mas Yaha replica en quichant lo primièr sus la palma aprèp un còp de pè a seguir de Tomkins. Puèi l’alièr catalan lisa e son adversari dirècte punta l’ensag. Abans la pausa, tala coma una mandra vièlha de Cerdanha, Tomkins recupèra un còp de pè transversal de Gigòt per marcar abans de mandar, sus la còrna, una penalitat sul pal esquèr (10-10).
 
A la represa, lo solelh catalan se carga un malhòt dels Dragons, tusta dins l’uèlh de l’arrièr vesitaire que manca una recepcion, un companh sieu recupèra la palma en posicion fòrajòc. Tomkins ensaca la penalitat (43a minuta; 12-10). Va seguir una mièja orada dominada pels angleses. Los catalans se multiplican en defensa. A la 75a minuta, al tèrme d’una cadena, Lucàs Albèrt desliura de l’exterior del pè dreit una palma a ras de pelena e Gigòt profièita de l’ofrenda: lo còp de la sèrp repetit cent còps a l’entraïnament a capitat! Tomkins ajusta la transformacion : 18-10, la messa es dita. Los Dragons, aprèp la mièja finala de la Copa de l’an passat, s’installan mai que jamai dins lo ròtle de bèstia negra dels Sants.
 
E ara, cal contunhar sus la lançada tre la recepcion d’Hull FC aqueste dissabte a Brutus abans lo rescontre a Londres (dijòus 18) e la recepcion de Castleford lo diluns de Pascas.
 
Dijòus, Hull KR dominèt Leeds: 45-26. Divendres, Wigan menèt 20-0 a Castleford mas perdèt 38-28. Un tombat de Brough a la 77a minuta permet a Wakefield de batre Huddersfield 17-16. Los Lops de Warrington marcan quatre còps mai de punts que Londres: 48-12, e passan davant Saint Helens en cap de fila del classament ont los catalans puntan en 6a posicion, darrièr Hull FC qu’a ganhat a Salford 23-16. Aquò ajusta a la necessitat d’una victòria aqueste dissabte!
 
 
Championship: Tolosa ganha petitament
 
Los occitans se son vist las pèiras aqueste dissabte a Blanhac per batre Featherstone (2-0 a la pausa; 8-0 marca finala: un sol ensag transformat e una penalitat!). Demòran a dos punts de Toronto venceire aisit de las Aglas de Sheffield: 40-10. E, justament, es a Sheffield que jogarà lo TO aqueste divendres abans de reçaupre Halifax lo diluns de Pascas (15h30).
 
 
Elèit 1: partidas a quatre punts
 
Aquesta dimenjada, lo calendièr d’Elèit 1 se metiá a jorn. Limós capitèt d’anar batre Avinhon 32-28 e Vilanòva finiguèt que batèt Tolosa: 30-18.
 
Atal, se coneis enfin lo classament al tèrme de la fasa anar, classament que permet de determinar las oposicions de la Dimenjada Magica que se tendrà aquestes 13 e 14 d’abril a Carcassona, amb lo programa seguent:
 
— dissabte13: Avinhon-Tolosa (14h), St Gaudenç-Palau (16h), lo dèrbi Lesinhan-Limós (18h)
 
— dimenge 14: Vilanòva-Albi (14h), l’afrontament dels primadièrs Dragonets-Carcassona (16h).
 
Los venceires de las partidas marcaràn 4 punts (en plaça de 3) al classament.
 
 
A taula:
 
Aqueste divendres 12, a Domèc, es una brava taulejada que marcarà los 80 ans de preséncia (de fait: 81!) del XIII a Carcassona, amb un espectacle suls ans… 80 e la celebracion de quatre vins del terrador (Cabardés, Corbièras, Malapèira, Menerbés; mas i aurà tanben de blanqueta de limós)!!!
 
L’endeman, serada iberica (paella e sevilhanas) totjorn a Domèc dins l’encastre de la Dimenjada Magica!
 
E reservatz ja vòstra jornada del dimenge 12 de mai pel dèrbi Carcassona-Limós: taulejada, animacion occitana amb de bodegaires e, de segur, la partida!
 
La taula es un bon endreit per tornar faire a l’infinit las partidas d’un còp èra e contar ja los rescontres a venir!
 
 
 
 
Alan Roch
 
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\'Alan Carcassona
2.

Precision : lo rescontre Sheffield-TO serà lo divendres 19 d'abril.

  • 1
  • 0
IEO-Aude Carcassona
1.

Rampèl : aqueste dijòus 11 d'abril, a 6 oras del vèspre, a l'Ostai de las Memòrias (53, carriera de Verdun a Carcassona) :
Conferéncia : « Rugbí : efècte de civilizacion, efècte de societat »
amb Joan-Francés Saisset e Alan Roch

Dintrada liura, mas se cal marcar : 04 68 71 29 69 ; ethnopolegarae.cbellan@orange.fr

  • 1
  • 0

Escriu un comentari sus aqueste article