Elèit 1: los primadièrs frenats
 
Dissabte, lo cap de fila Carcassona pleguèt a Albi, menat de man de mèstre per l’australian Alexander Grant, autor de 3 ensages (victòria dels Tigres: 36-24). Lo segond, Lesinhan agèt totas las penas del Mond a Vilanòva e repartiguèt batut: 30-14. Los tresens, los Dragonets esprovèron tanben de dificultats per batre Tolosa 38-30. Lo campion Avinhon se reviscòla, mas tròp tard per anar quèrre una plaça qualificativa: victòria 40-18 contre Sent Gaudenç. Dimenge, Limós ganhèt una partida sens grandas envoladas contra Palau 30-14.
 
Aquesta primièra dimenjada de mai, plaça dissabte a las mièjas finalas de la Copa Lòrd-Derby a Carcassona: Limós-Dragonets (15 h) e Carcassona-Lesinhan (17h30). Puèi, dimenge a Limós, mièjas finalas de la Copa Nitard, la competicion dels juniors U-19: Avinhon-Dragonets (14h) e Lesinhan-Tolosa (16h). Las finalas son previstas a Brutus lo dimenge 9 de junh.
 
 
Superliga: dur segond temps pels Dragons 
 
Los Dragons anavan desfisar lo cap de fila, Saint Helens; Baitieri los daissèt a l’escalfament. Lèu, dins la partida, Mead e Edwards sortiguèron nafrats. Se los catalans tenguèron còp fins a la pausa (menats 16-10), foguèron despassats pel ritme anglés dins lo segond temps per encaissar un dolorós 50-14 e qualques dobtes, amb la cordelada de nafrats, per anar afrontar Hull FC dissabte de vèspre.
 
Gaire de punts per la victòria de Wigan fàcia a Castleford: 6-4. Salford ganha aisidament a Londres: 30-10. Los Lops se desfàn dels Gigants 50-19. Hull FC bat Wakefield 30-14 e Leeds capita de prene l’avantatge sus Hull KR 28-24.
 
 
Championship: lo cambajon resistís
 
Dissabte, Tolosa ganhèt dins las darrièras minutas fàcia a York: 30-26. Dissabte, los occitans jogaràn a Dewsbury.
 
 
NRL: un campionat dobèrt
 
Melbourne esperèt las darrièras minutas per batre los neozelandeses mercé a un tombat (78a): 13-12. Los Lapinons van batre Penrith: 22-18. Brisbane torna prene de vam amb una larga victòria sus Cronulla 29-6. Se tres formacions son en cap de classament (Roosters, Melbourne e Lapinons), se ne trapa sèt en coa de classament amb solament doas victòrias dins las 5 partidas jogadas. (www.nrl.com)
 
 
Rugbi e fèsta occitana
 
Dimars 7 de mai, a 6 e mièja del vèspre, se parlarà dels ligams entre XIII e occitan a l’entorn del libre Lo XIII, aquò òc! a la mediatèca de Lesinhan.
 
 
Dimenge 12 de mai, lo dèrbi Carcassona-Limós serà plaçat jol signe de la fèsta occitana. A miègjorn, jol tibanèl de Domèc decorat de sang e d’aur, la taulejada virarà a l’entorn d’un freginat. Los bodegaires de la Montanha Negra asseguraràn l’animacion musicala del dinnar, de la partida (16h) e del tresen mièg temps (35 èuros, lo repais e la plaça per la partida. Per faire partida de la taula IEO: +33(0)4 68 25 19 78 o ieo11@ieo-oc...)
 
 
 
 
Alan Roch