Bandièra01 1180x150: Comuna de Tolosa

Actualitats

Rugbi de XIII: Carcassona e Dragonets se balhan rendètz-vos a Brutus

Ramelet de punts e d’ensages aquesta dimenjada de l’NRL a la Copa de França en passant per la Superliga e lo Championship

Aqueste dimenge 12 de mai, lo partida Carcassona-Limós celebrarà la cultura occitana amb los Bodegaires de la Montanha Negra per animar la taulejada, lo rescontre e lo tresen mièg temps
Aqueste dimenge 12 de mai, lo partida Carcassona-Limós celebrarà la cultura occitana amb los Bodegaires de la Montanha Negra per animar la taulejada, lo rescontre e lo tresen mièg temps
Copa: Dragonets e Carcassona a l’ofensiva
 
L’estadi Domèc de Carcassona èra l’encastre de las mièjas finalas de la Copa Lòrd-Derby aqueste dissabte de vèspre, malgrat lo temps ivernal.
 
Dins la primièra partida, los catalans bailegèron lo rescontre d’un cap a l’autre e s’infiltrèron aisidament dins una defensa limosenca despassada pel vam e per la joinesa e la velocitat catalanas: 24-8 a la pausa, 47-12 al final.
 
Dins lo segond rescontre, entre Carcassona e Lesinhan, los Canaris dobriguèron la marca per un ensag del centre Vincenç Albèrt. Los Molinièrs prenguèron un carton jaune: los locals ne profeitèron per marcar tres ensages (2 per l’alièr papó, Gary Lo) e faire lo trauc: 26-6 a la pausa. A la represa, Lesinhan ensagèt de faire son retard. La defensa carcassonesa tenguèt còp. Lo pilar Tisseire redusissiá la marca a un quart d’ora de la fin, mas Vincenç Albèrt met a profièit una contrataca collectiva de 70 mètres per plegar lo sòmi de remontada de la formacion de Corbièras. Fin finala, Carcassona ganha 30-18 e afrontarà St Estève-XIII Catalan lo dimenge 9 de junh a Perpinhan. Una finala que promet entre las doas còlas qu’an lo palmarès lo mai bèl del movement tretzista.
 
En serada, totjorn a Carcassona, es l’esquipa d’Avinhon que se ganhèt la finala de la Copa dels XIII-cadieral contra los catalans al tèrme d’una partida endiablada: 55-44.
 
Lo dimenge a Limós se tenguèron las mièjas finalas de la Copa Nitard, competicion dels juniors U-19. Se qualifiquèron per la finala: los catalans que batèron Avinhon 30-22 e lo Tolosa Olimpic mercé a un final de tria: 34-26 fàcia a Lesinhan.
 
Dimenge de vèspre (16h), Carcassona e Limós tornaràn trepar la pelena de Domèc per un dèrbi que seguirà una brava taulejada dins una jornada festiva dedicada a la cultura occitana e animada pels Bodegaires de la Montanha Negra.
 
 
Superliga: lo revenge dels Dragons
 
Aquela l’avián en travèrs de la garganta, los Dragons: la desfaita 31-30 dins las darrièras segondas e al punt en aur a Brutus fàcia a Hull FC. Mas dins quin estat d’esperit anavan dintrar sus la pelena, los catalans, aprèp la desbaruta a Saint Helens (50-14)? Los angleses marquèron los primièrs, puèi i agèt una sola esquipa sul terren: los catalans per marcar sièis ensages, 5 transformacions, una penalitat e un tombat (18-6 a la pausa; 37-6 al final). Aquela victòria permet als catalans de montar a la quatrena plaça al classament.
 
Warrington (26-14) a Castleford, Wakefield (26-25) a Huddersfield e lo primadièr Saint Helens cò d’Hull KR (42-26) ganhèron tanben al defòra alara que Wigan batiá Londres (18-8) e Salford ganhava contra Leeds (28-16).
 
Dissabte, los catalans dintraràn en liça per defendre la Cup emportada l’an passat. Lo tiratge al sòrt lor a designat coma adversari una formacion de League One: Doncaster, que reçaupràn dissabte de vèspre a Brutus. Puèi, dissabte 18, serà lo grand viatge a Barcelona per jogar contra Wigan dins l’encastre bèl e magic del Camp Nòu.
 
 
Championship: Tolosa marca de punts
 
En Championship, Tolosa jogava a Dewsbury e s’impausèt pro aisidament 38-0. Ara, una dimenjada de pausa pels occitans abans d’afrontar a Blackpool lo cap de fila Toronto pel compte del Summer Bash, la version Championship de la Dimenjada Magica.
 
 
NRL: Lapinons e Polets en cap de classament
 
Aprèp uèit jornadas de campionat, son los Lapinons e los Polets que son en cap del classament de l’NRL amb 7 partidas ganhadas e una sola desfaita. Melbourne coneis la desfaita cò de las Làmias 20-18.
 
Los australians se meton tanben a l’ajustièr d’una jornada a lor campionat: lo Magic Round per balhar encara mai d’ample a la dinamica tretzista del país amb uèit rescontres que se debanaràn a Brisbane de dijòus a dimenge: una lo dijòus, doas lo divendres, tres lo dissabte e doas lo dimenge.
 
 
Occitanitat del rugbi
 
Aqueste dimars 7 de mai, a 6h e mièja del vèspre, se parlarà dels ligams entre XIII e occitan a l’entorn del libre Lo XIII, aquò òc! a la mediatèca de Lesinhan.
 
 
 
 
Alan Roch
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Las xeremies son molt festeras, van molt ben per animar. La cançon "Oh my Darling Clementin"qu' es molt animada i es fica molt dins lo cap de maniera que se canta durant molt de temps, es pot tocar e cantar durant los partits.
La cançon diu aital:
Clementina, Clementina ,Clementina del meu cor. Se l'emportan las unadas que mala es la meva sort. E la gent podria fer una nova letra:
Occitània, Occitània, Occitània del meu cor. Occitània, Occitània. Occitània, Campion !
A mi m'agrada molt la versió: Barcelona, Barcelona, Barcelona del meu cor. Barcelona, Barcelona ,Barcelona ,Campió . Sempre que guanha el Barça la cant e fa contenta a la gent.
E tamben es pot fer:
Oh Narbona, Oh Narbona, Oh Narbona del mieu cor. Oh Narbona. Oh Narbona. Oh Narbona. Campion.

  • 0
  • 0

Escriu un comentari sus aqueste article