Bandièra01 1180x150: Comuna de Tolosa

Actualitats

Rugbi de XIII: lo XIII es magic plan mai qu’a Liverpool!

La premsa anglesa saluda la victòria catalana a Barcelona
La premsa anglesa saluda la victòria catalana a Barcelona

Moment clau de la sason tretzista: al país, d’unes acaban lor sason; d’autres se preparan per las fasas finalas. Austràlia vei arribar los tempses dels Estats d’Origina. Las posicions s’afirman e se confirman en Superliga e Championship.


Los Dragons encadenan 
 
Aprèp lo Camp Nòu de Barcelona, los catalans decobrissián un autre estadi bèl del mond de la bala al pè: Anfield Road a Liverpool. Dobrissián la Dimenjada Magica fàcia a Wakefield, sens los nafrats Sam Tomkins, Greg Bird, Mike McIlorum o Lucàs Albèrt. Los Sang e Aur marquèron dos ensages dins lo primièr temps. A la represa, los angleses egalizavan abans de prene un temps l’avantatge. A 18-18, Tòni Gigòt ajustava un tombat de mai de 40 mètres e Benjamin Garcia completava la marca amb son segond ensag sus la còrna: victòria catalana 25-18.
 
Dissabte, los Gigants d’Huddersfield se mostravan sens pietat (55-2) per Hull FC, alara que Warringtion fasiá plegar un còp de mai Wigan: 26-14.
 
Lo dimenge, partidas sarradas e victòrias d’Hull KR fàcia a Salford (22-20) e de Leeds contra Londres (24-22) alara que lo cap de fila St Helens dominava Castleford: 36-16.
 
Los Dragons s’installan en tresena posicion al classament (20 punts), luènh de St Helens (30) e Castleford (24). Wakefield es per l’ora 6n, la primièra plaça dels non-qualificats e a 4 punts dels catalans. Una bona posicion, doncas, pels Sang e Aur.
 
 
Defendre la Cup
 
Ara, es una autra escomesa que se presenta als catalans: la defensa de la Cup. Dobriràn los quarts de finala aqueste dijòus de ser (partida retransmesa per BeInSport) amb una partida de jogar cò d’Hull FC; los catalans son demorats en Anglatèrra per preparar al melhor lo rescontre.
 
Las oposicions dels autres quarts son: Hull KR contra Warrington, divendres; Saint Helens-Wakefield, dissabte; la partida entre los dos rescapats del Championship Bradford e Halifax, formacions del ric passat, dimenge de vèspre.
 
 
Championship: lo TO en forma
 
En Championship, lo Tolosa Olimpic recebiá dissabte de vèspre a Blanhac un concurrent dirècte per la plaça de segond al Championship: los Centurions de Leigh. Los occitans joguèron una partida de primièra per ganhar largament 44-16. Los occitans poiràn renfortir lor posicion amb la recepcion de Swinton, dissabte 15 de junh.
 
 
Elèit 1: festenal ofensiu
 
En Elèit 1, los primadièrs coneguèron una dimenjada dificila. Dissabte, los Dragonets ganhèron a St Gaudenç: 28-26. Dimenge, a Palau, Carcassona joguèt un supèrb primièr temps, menèron 42-10 a la 50a minuta, mas a una minuta de la fin los catalans èran tornats a 40-42! Un darrièr ensag e victòria dels Canaris 46-40.
 
Los carcassoneses acabaràn la fasa de classament en primièra posicion e jogaràn la mièja finala a domicili, coma los catalans.
 
Lo dèrbi audenc foguèt fisèl a la tradicion e qualques punhs se mesclèron als punts: victòria de Limós 22-16 fàcia a Lesinhan. Las autras resultas: Albi-Tolosa: 54-10; Vilanòva-Avinhon: 20-10.
 
Al programa de la darrièra jornada de classament: Avinhon-Albi; Carcassona-St Gaudenç; Dragonets-Vilanòva; Tolosa-Limós; Lesinhan-Palau.
 
 
Elèit 2: lo programa de las fasas finalas
 
En Elèit 2, se sabiá ja que Baó e Vilagalhenc-Argon èran los qualificats dirèctes per las mièjas finalas. En barratge (8 o 9 de junh), se jogaràn los rescontres Carpentràs-Entraigas e Pià-l’Escura.
 
 
Polida vesprada pels Singlarons
 
Dissabte de vèspre, los joves jogavan las finalas de Copa a Pià. En U15 (minims), l’MJ Carcassona menèt 16-0 mas l’FC Lesinhan s’impausèt: 18-16. En capdèts (U17), los lesinhaneses emportèron lo trofèu fàcia als avinhonencs: 36-12.
 
 
Austràlia: cap als Estats d’Origina
 
La primièra oposicion dels Estats d’Origina per 2019 se tendrà lo dimècres 5 de junh a Brisbane; la segonda partida se debanarà a Perth lo dimenge 23 de junh; lo tresen rendètz-vos tornarà trapar l’ANZ Stadium de Sydney lo dimècres 10 de julh.
 
En campionat NRL, son de notar las victòrias dels Titans a Manly (36-18), de Newcastle fàcia als Roosters (38-12); dels Lapinons contra los Tigres de l’Oèst (32-16), de Melbourne a Canterbury (28-6) e de las Làmias cò dels Dragons de Sant Jòrdi (22-9).
 
 
 
 
Alan Roch






abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\'Alan Carcassona
1.

L'expédition de Barcelona, contact dans la croisa Lo papieròt Menerbés (Semaine du Minervois, 30/05/19)

BARCELONA, CAPITALA XIII
E òc, i èri ! L'un dels 31 555 espectators que se ramosèron aqueste dissabte 18 de mai al Camp Nòu a Barcelona. Se pòt somiar d'èsser 90 000 per emplenar l'estadi (es un pauc mai grand que Domèc !) : s'i arribarà un jorn, mas per l'ora es l'afluéncia la mai fòrta per una partida de la fasa de classament de la Super-Liga. Los Angleses de Wigan èran venguts a mai de cinc mila. Mai de 170 autocarris èran partits de Perpinyà, de Carcassona, de Limós, de Vilagalhenc, d'Albi, de Tolosa, de Provença, de Lesinhan e ne passi... (sens comptar totes aqueles que n'avián profitat per passar dos o tres jorns dins la capitala catalana).
Atal, èri dins lo carri dels Dragons de Lauquet, los afogats dels Dracs qu'organizan los desplaçaments a Brutús los jorns de partida. Dos autocarris : mai de 120 personas. Foguèrem plan sonhats. Arrèst-dejunar lo matin (la tradicion de la saqueta se pèrd pas) sus l'airal d'autorota de l'Alt-Empordà. I aviá de qué manjar. Un menu dietetic que vos disi pas (d'unes afirmèron qu'èra esponsorizat per Pâté-Sport) : pastisses, salsissas, salsissòt, tripon, fromatge de cap, crostilhetas, e de vin segur ! A miègjorn, cadun se petacèt dins l'airal del Camp Nòu. Al retorn, autre arrèst. Mas aqueste còp, i aviá plan un desenat d'autocarris e cadun aviá sortit de que manjar. Bon, s'acabèt las charcutalhas del matin, mai de salsissòt a l'alh, un autre pastís, olivas, cacauèts, rostit (pòrc o vedèl), cuèissas de polet, iranges... Sens parlar del Robèrt, qu'apuèi una dama-joana de sangrià-recèpta especiala de l'ostal, faguèt virar dins lo carri : cartagèna, prunas a l'alcòl e verbena (e èra pas de tisana).
Èrem en Catalonha. De roge e d'aur, n'i aviá de pertot ! Los castellers montèron lor edifici uman. L'Albèrt Buenò i anèt d'Els Segadors, mas aqueste còp acompanhat per 50 coristas del país. Lo president de la Generalitat èra en tribuna. Los independentistas desrotlèron doas bandeiròlas : l'una amb un sol mot « Independéncia », l'autra escrita en anglés per dire que l'autodeterminacion es un dreit, pas un crimi.
Sus la pelena verda, ont una èrba despassava pas, las doas formacions se liurèron una partida de tria. E sabètz çò qu'es quand sètz assetats en tribuna, que vos quilhatz e trepejatz, podètz passar de la jòia la mai bèla a la mai granda pena del monde : sufís d'un rebomb de la pauma, dun còp de fiulet de l'arbitre, d'una intercepcion, d'un còp de pè tròp cort,... Enfins, los Dragons i metèron d'èime e de biais per ganhar la partida (33-16) e nos faire bramar (coma d'ases — o de burros ?—) : « Catalans ! Catalans ! »
Me soi plan regalat. Espèri plan de tornar al Camp Nòu. Demòra als Dracs de ganhar ongan la Super-Liga e de desfisar l'an que ven lo venceire de la Cup (se ganhan pas los dos trofèus !).
Bon, es pas lo tot : aqueste dimenge 9 de junh, anirem faire un torn a Brutús, mas serem vestits de pè en cap en jaune e negre en sosten de Carcassona-XIII que jòga la finala de la Copa Lòrd-Derby contra los Dragonets.
Dracar Roch

  • 0
  • 0

Escriu un comentari sus aqueste article