Cup: de Dragons atupits a fèt
 
Los Dragons tornaràn pas a Wembley ongan aprèp lor pietadosa prestacion en quart de finala cò d’Hull FC. Dos ensages encaissats tre las primièras uèit minutas. Un subresaut per respondre per dos ensages (non transformats) de Tierney. 12-8 pels angleses a la pausa. A la represa, Hull preniá l’avantatge sus una penalitat; puèi, marcava un ensag. Los Dragons ensajan de repartir d’un bon pè, mas, sus una ataca temerària, una intercepcion e èra un novèl ensag de 80 m, e puèi veniá l’avalanca: 39 punts encaissats dins lo segond temps sens ne marcar un sol! Los catalans faguèron la mòstra de tot çò que cal pas faire: defensa passiva, passas aproximativas, fautas de man, còps de pè de rossinhòl… Un grop de trèvas per una vertadièra pietat que se clavèt sus un 51-8 pels angleses.
 
Divendres, la partida foguèt mai plasenta e mai disputada: se clavèt per una corta victòria de Warrington fàcia a Hull KR: 28-22.
 
Dissabte, Saint Helens se qualifiquèt aisidament fàcia a Wakefield: 48-10.
 
Dimenge, dins la partida mai equilibrada dels quarts entre los dos pensionaris del Championship, Halifax se va qualificar a Bradford: 20-16.
 
Las mièjas finalas se debanaràn lo dissabte 27 de julhet a Bolton: St Helens deuriá passar l’obstacle Halifax; partida indecisa de preveire entre Warrington e Hull FC.
 
Aqueste dissabte, novèl viatge dels Dragons en Anglatèrra: cò dels Lops de Warrington. Mèfi de se faire pas manjar tot cruses!
 
 
Elèit 1: lo tablèu de las pelhòfas conegut
 
Aquesta dimenjada, se debanavan las darrièras partidas de la fasa retorn. Cambièron pas lo classament amb la victòria de Carcassona fàcia a St Gaudenç (44-24), dels Dragonets fàcia a Vilanòva (34-22), mai de 100 punts marcats a Lesinhan ont lo FCL bat Palau 58-43, Limós s’impausa a Tolosa: 56-12 e Albi ganha a Avinhon: 34-22.
 
Al classament, Carcassona acaba 1r (48 punts) e los Dragonets darrièr (45 punts): las doas formacions son dirèctament en mièjas finalas.
 
Seguisson: Lesinhan (3n, 42 pts), Limós (4n, 42 pts), Albi (5n, 39 pts) Vilanòva (6n, 36 pts).
 
La dimenjada dels 15 e 16, los barratges opausaràn, suls terrens audencs, Limós e Albi, Lesinhan e Vilanòva.
 
An acabada la sason: Palau (7n, 26 pts), lo campion Avinhon (8n, 25 pts), St Gaudenç (9n, 19 pts) e Tolosa en lantèrna roja (17 punts).
 
 
Finala de la Copa a Brutus
 
Aqueste dimenge 9 de junh, tres partidas son programadas a l’estadi Brutus:
 
— la finala de la Copa dels juniors entre lo XIII Catalan e Tolosa
 
— la finala del campionat femenin d’Elèit entre las catalanas e Tolosa-Ovalia
 
— la finala de la Copa Lòrd-Derby entre Carcassona e los Dragonets. Una partida que s’anóncia sarrada.
 
 
Elèit 2: lo Challenge Aillères per Baó
 
La finala catalana de la Copa de l’Elèit 2 se teniá lo dijòus de l’Ascension dins la banlèga tolosana a Ramonvila. Baó ganhèt pro aisidament contra Pià: 40-12.
 
Aquesta dimenjada de Pentacosta, plaça als barratges del campionat: Pià-Lescura e un dèrbi de la Vau Clusa: Carpentràs-Entraigas. Los venceires provençals jogaràn contra Vilagalhenc-Argon e l’autre ganhant a Baó dins una quinzenada.
 
 
U15 e U17: doblat catalan en campionat
 
A Selon de Provença, se debanavan aqueste dissabte las finalas del campionats U15 (minims) e U17 (cabdèts) amb un doble afrontament entre lo XIII catalan e lo FC Lesinhan. Las doas partidas virèron a l’avantatge dels catalans: victòrias 34-12 en U15 e 34-18 en U17.
 
En femeninas, Marselha bat Realmont 46-28 en U17 e Montpelhièr ganha lo títol de la Division Nacionala: 38-18 contra Limós.
 
A Lescura, lo dimenge 16 de junh, en Nacionala 2, la finala opausarà la Reula e Salsas; seguirà la finala de Nacionala 1 entre Realmont e Ille.
 
 
Austràlia: primièr Estats d’Origina de la sason aqueste dimècres
 
Una de las particularitats del XIII es que la partida la mai importanta es pas la finala de la Copa del Mond, mas los 3 afrontaments annals entre las doas províncias australianas: Nòvas Galas del Sud e Queensland, los Estats d’Origina. Primièr rescontre de l’an: aqueste dimècres 5 de junh a Brisbane.
 
Una partida de seguir sus BeInSport que ven d’anonciar qu’aviá tornat signar per 3 annadas (fins a la sason 2022) la retransmission de las partidas de l’NRL.
 
 
 
 
Alan Roch