Dins aquesta cronica, cantam d'una setmana a l'autra las lausenjas del rugbi de XIII. Coma totes los espòrts, dins sas valors fondamentalas, se trapa lo respècte: respècte del jòc, de la palma, dels partenaris, de l'adversari, dels sostens, del public, de las règlas... Damatge qu'aquesta valor se doblide de còps que i a.

Superliga: los Dragons en pana de jòc
 
Aprèp 7 setmanas luènh de lor basa, los Dragons Catalans tornavan trapar Brutus amb la recepcion dels darrièrs de la competicion, los London Bròncos. Mas lo jòc dels Sang e Aur aviá pas res de veire amb una bona ollada: puslèu de farinetas sens gost, de tofu sens salsa! Tot i passèt: passas mòlas, jòc al pè sens ambicion, ofensivas estequidas e tròp estereotipadas, defensa aconsomida. E es atal qu'amb mai de vam e de solidaritat, los londinencs s'impausèron: 30-12 fàcia a una formacion que respectèt pas cap de plan de jòc e qu'acabèt jols fiulets d'una part del public. Dissabte, es Hull FC que jogarà a Perpinhan: una formacion en batèsta amb los catalans per la tresena plaça. Los Dragons an una setmana per faire provision de vam e d'èime…
 
Hull FC vira plan e a lo moral: victòria a Castleford: 31-18. Lo cap de fila St Helens domina Huddersfield: 38-2. Hull KR fa plegar Warrington: 16-14. Salford (venceire de Wakefield: 44-20) e Wigan (victòria a Leeds: 23-14) desespèran pas de montar dins lo vagon dels qualificats per las pelhòfas.
 
 
Elèit 2: escòrnas e patacs
 
Autre punt negre de la setmana: las escòrnas que marquèron la remesa dels XIII d'Aur al Barcarés, la velha de la finala de la Copa. Tot se passèt fòrça plan, dins un bon ambient. Levat qu'al moment de la remesa del trofèu de l'Elèit 2, a una taula, un convidat i anèt d'escòrnas racistas, represas suls rets socials. Polemica, sasida del tribunal per la Federacion, …
Un jogaire tocat per las escòrnas èra de Carpentràs. En debuta de la mièja finala, Vilagalhenc-Argon contra los provençals, las doas formacions se remosèron a l'entorn d'una bandeiròla: «Tòques pas al collèga» (Touche pas à mon pote). Mas, a la 50a minuta, alara que los jogaires de Cabardés èran a faire la diferéncia, esclatèt una generala que menèt Carpentràs a daissar lo terren. Qun tristum! S'espèra l'acamp de la comission de disciplina per estatuar abans la finala que deuriá opausar lo VARL a Baó, qu'a eliminat Pià: 44-16.
 
Es justament a Pià que se debanarà una finala que, o cal esperar, serà de tot en tot dedicada al jòc. En dobertura, se disputaràn las finalas dels juniors federals (Carcassona-Illa) e de Federala (Gratentorn-St-Estève).
 
Elèit 1: la logica respectada
 
En Elèit 1, aqueste dimenge, se joguèron las partidas de barratge. A Lesinhan, los locals accelerèron dins lo segond temps per s'impausar 35-20 fàcia a Vilanòva.


A Limós, la partida comencèt per un omenatge a dos valents guerrièrs locals: lo mesclanha Michael Murcia e lo talonaire Silvan Teixido que jogavan lor darrièra partida a domicili. Albi se perdèt lo rescontre en sabent pas metre a profièit una superioritat numerica de mièja ora e en vendemiant de situacions d'ensag. Los tarneses venguèron clavar la sason a dos punts de Limós: 26-24.
 
En mièja finala, Carcassona reçauprà Limós e Lesinhan anirà afrontar St Estève-XIII Catalan. 
 
 
Trofèus pels catalans
 
Aqueste dimenge, se jogavan las finalas de Nacionala 1 e de Nacionala 2 a l'Escura d'Albigés.
En Nacionala 2, lo trofèu pren la direccion de Salsas, venceire de la Reula-Bèglas: 24-20.  
 
En Nacionala 1, Illa gardèt l'avantatge sus Realmont: 22-18.
 
 
Championship: Tolosa susprés
 
En Championship, a Blanhac, Tolosa se fa susprene per Swinton e pèrd 20-18. Pas las melhoras condicions per preparar lo desplaçament e la partida cò dels primièrs, a Toronto, aqueste dissabte 22 de junh.
 
 
Un Estat d’Origina deslocalizat
 
La segonda partida dels Estats d’Origina se jogarà a Perth aqueste dimenge. Per un còp, lo campionat NRL marcarà una pausa.
 
Una partida internacionala opausarà dissabte Samoa e Tònga.  La partida de las femeninas entre Queensland e Nòvas Galas del sud se poirà seguir divendres sus BeInSport.

 
 
 
Alan Roch