Elèit 1: lo planchòt pels catalans
 
La temperatura avesinava los 40° sul còp de 7 oras del ser quand Canaris e catalans entamenèron la partida. Dins lo primièr temps, se vegèt una sola formacion sul terren: los audencs que marquèron quatre ensages per menar 22-4 a la pausa. Lo sorire dels sostens carcassoneses anava virar a la sopa de morre aprèp una represa terribla dels Dragonets que puntavan dos ensages dins las primièras tres minutas. La bèla mecanica audenca èra demorada al vestiari e los catalans prenguèron la direccion de las operacions e finiguèron que ganhèron 32-24. Cinc ensages marcats dins aquel prolific segond temps contra una magrinèla penalitat. Atal, Carcassona se ganhèt la Copa e los Dragonets lo campionat! Una polida fin de sason, doncas.
 
 
Juniors-U19: lo planchòt pels provençals
 
En rason de la calorassa, la finala dels U19 èra estada remandada de 4 e mièja del vèspre a 9 oras del ser. Èra sens comptar sens las fantasiás dels lums de l'estadi que metèron una brava mièja orada per s'alucar. Çò que fa que Lesinhan e Avinhon joguèron la finala dins de condicions idealas! Totun, los audencs foguèron mai espectators qu'actors. Los provençals se mostrèron mai solidaris e mai dinamics. Marquèron una cordelada d'ensages per ganhar 42-8.
 
 
Dragons: la descenda als infèrns se perseguís
 
La setmana passada, aprèp lo 50-10 encaissat a Brutus fàcia a Hull FC, los Dragons avián agut dreit dimenge de matin a una brava explicacion de tèxte del president Guasch que demandèt als jogaires de se tornar mobilizar. Mas los mots pòdon pas res per reviscolar una formacion que i arriba pas mai: aqueste dimenge, novèla desfaita a Leeds 31-12. E los catalans, un moment tresens al classament, se fan doblar per Castleford e Wigan per se trapar 6ns. Seisens, aquò vòl dire la marrida plaça, la del primièr non-qualificat per las pelhòfas. Una pietadosa diferéncia de punts, negativa: -117! E jos la menaça de Salford e Wakefield. Una esquipa de Wakefield que ven de batre Huddersfield 36-10 e que, justament, serà a Brutus aqueste dissabte. Lo president Guasch e l'entraïnaire McNamara traparàn lo biais de remobilizar las tropas o l'espirala de la desfaita serà tròp fòrta?
 
 
Tolosa a la relança
 
En Championship, aprèp doas desfaitas, lo Tolosa Olimpic se va impausar largament a Barrow 36-6 abans de reçaupre Bradford a Blanhac aqueste dissabte a 8 oras del ser.
 
 
NRL: la Tempèsta fa lo trauc
 
Mercé a una victòria fàcia als Polets a Sydney 14-12, la Tempèsta de Melbourne es cap de fila del classament de l’NRL amb 6 punts d'avança sus sos adversaris de la jornada e suls Lapinons que son a l'arrèst amb 4 desfaitas consecutivas, la darrièra 14-9 aqueste dijòus cò dels Tigres de l'Oèst.
 
 
 
 
Alan Roch