Estats d'Origina: fins a la darrièra segonda
 
Sold out: demorava pas una plaça de liura dimècres de ser a l'ANZ-Stadium de Sydney. Los Blaus de Nòvas Galas del Sud encadenarián sus lo trofèu de l'an passat?
 
Lo primièr temps foguèt a l'avantatge de Queensland, mas los Blaus capitavan a tornar a egalitat aprèp una relança de l'arrièr Tedesco: 8-8 a la pausa.
 
La partida cambiava de biais a la represa. Los Blaus marcavan dos ensages e menavan 20-8. Queensland capitèt a tornar a nautor dins las darrièras dètz minutas, mas una darrièra contrataca dels Blaus dins las darrièras trenta segondas s'acabava darrèr la linha blanca. Victòria de Nòvas Galas del Sud: 26-20!
 
 
400 partidas d’NRL per Cameron Smith
 
Èra fèsta aqueste dissabte a Melbourne per celebrar las 400 partidas d’NRL jogadas pel talonaire Cameron Smith, fidèl dempuèi 18 sasons a la Tempèsta, seleccionat pel Queensland (victòrias dins los Estats d'Origina de 2006 a 2017) e pels Cangorós (campion del Mond en 2013 e 2017). Lo primièr a arribar a aquela chifra bèla! Fuòc d'artifici, preséncia del primièr ministre… L'autor de mai de 2500 punts dins la competicion participèt a la victòria dels locals fàcia a Cronulla: 40-16. Melbourne es mai que jamai lo primadièr al classament.
 
Originalitat: las prolongacions arriban pas de trapar un venceire a la partida nne-NZ Combatents: egalitat a 18 punts. Cal un tombat a tres minutas de la fin per permetre als Lapinons de batre Manly: 21-20. Los Poletons se fan susprene pels Vaquièrs 12-15 e daissan la tresena plaça a Canberra, venceires a Sant Jòrdi Illawarra 36-14.
 
 
Superliga: Los Dragons se fan paur…
 
L'entraïnaire McNamara comptava de faire dintrar sus la pelena d'Huddersfield los venceires de Wakefield, mas lo talonaire McIllorum se nafrava a l'escalfament. Dins lo primièr temps, Sam Tomkins signava tres ensages. Avantatge als catalans: 22-12. Avantatge refortit per dos ensages de Broughton a la represa: 32-12. E aquí las causas se complicavan: nafraduras de Dacosta e Broughton, un ensag refusat per l'arbitre de tòca, un carton jaune per Edwards. Los Gigants ne profeitavan per tornar a la marca. Los Dragons resistissián per ganhar fin finala 32-28.
 
Ganhan tanben al defòra: Hull KR a Leeds: 32-16; Castleford a Wakefield: 36-16; Salford a Warrington: 22-12.
 
Hull FC fa lo trauc dins lo primièr temps contra Londres: 35-22 e lo primièr Saint Helens domina Wigan 32-10.
 
Desplaçament pas dels mai aisits aqueste dimenge 21 de julh pels Dragons cò dels Diables Roges de Salford. Los Sang e Aur tornan trapar la quatrena plaça al classament, mas demòran jos la menaça de Wigan, Castleford e… Salford per demorar dins lo grop dels cinc qualificats.
 
 
Tolosa se relança
 
En Championship, Tolosa anava jogar cò del darrièr Rochdale. Aquò li permetèt dissabte de tornar trapar lo gost de la victòria: 68-0. L'alièr Bergal marca sièis ensages dins la partida. En Canadà, Featherstone pausèt de problèmas al cap de fila Toronto que se contentèt d'un 22-18.
 
Dissabte, a 6 oras del vèspre, los occitans recebon a Blanhac las Aglas de Sheffield, un adversari qu’amira una plaça dins lo grop dels cinc qualificats. Una partida doncas a 4 punts pels Blaus e Blancs.
 
 
Los U17 en Anglatèrra
 
La formacion dels joves franceses U17 jogarà doas partidas contra los angleses: dimècres 17 a Hull, puèi dissabte 21 a Wakefield. Las partidas se poiràn seguir en dirècte sul sit de la Federacion.
 
A la fin de setembre, los U19 aniràn jogar en Nòva Zelanda e qualques partidas contra Turquia e Itàlia son previstas pel XIII de França femenin.
 
 
 
 
Alan Roch