Bandièra01 1180x150: Comuna de Tolosa

Actualitats

Rugbi de XIII: punts e punhs a Brutus

Lo papó David Mead, plaçat a l’ala, marca un ensag e es designat òme de la partida
Lo papó David Mead, plaçat a l’ala, marca un ensag e es designat òme de la partida

D'aquesta passa, cada partida compta en Superliga, en Championship o NRL per la qualificacion per las fasas finalas o per l'obtencion d'un melhor classament. Cèrts rescontres son sarrats, d'autres viran a l'avantatge bèl d’una de las formacions en preséncia.


Superliga: lo nhac dels catalans
 
Una partida d'importància pels Dragons aqueste dissabte a Brutus. Interdiccion de pèrdre, si que non adieu a las pelhòfas! En fàcia, los Lops de Warrington, totjorn malcorats de la desfaita en finala de la Cup l'an passat.
 
D'intrada, se saupèt que la partida seriá d'una nauta intensitat! Los catalans dominavan, mas lor avantatge a la pausa demorava magrinèl (8-4; un ensag de Yaha e doas penalitats de Tomkins contra un ensag de l'alièr Mamo).
 
A la represa, Hill profeitava d'un traucàs dins la defensa catalana per puntar l'ensag al pè dels pals. Rachford ajustava los 2 punts de la transformacion e los Lops passavan davant: 10-8. Los Dragons tenián còp en defensa e prenián d’iniciativas en ataca: passavan tres còps la linha anglesa (Mead, Withley, Gigòt). Sam Tomkins ensacava las transformacions, ajustava doas penalitats e los catalans menavan 30-10.
 
Demorava 20 segondas de jogar quand un placatge catalan menava a una batèsta generala que prenguèt d'ample. L'arbitre sortissiá dos cartons roges pels catalans (McIlorum e Tomkins), e mai los Lops foguèsson pas blancs coma d’anhèls dins l'afar; en tribuna, qualques sostens angleses se'n prenián al public de las lòtjas. La partida s'acabava dins la confusion. A Perpinhan, se va esperar amb plan de crenta las decisions de la comission de disciplina aprèp las 2 expulsions.
 
La desfaita d'un punt (26-27) de Castleford cò d'Hull-KR torna plaçar los catalans en 5a posicion, la darrièra qualificativa per las pelhòfas.
 
Divendres, los Sang e Aur jogaràn a Leeds, de Rinocèros totjorn en cèrca d'assegurança de manten en Superliga. Una victòria catalana seriá la benvenguda.
 
Lo cap de fila Saint Helens ganha contra Wakefield 26-6: l'escasença pel talonaire Roby de jogar sa 400a partida de Superliga e pel catalan Théo Fages la centena partida jogada jol malhòt blanc e roge.
 
 
Championship: Tolosa en cadena
 
Lo Tolosa Olimpic jogava una partida d'importància cò dels miègfinalistas de la Cup: Halifax. Menats a la paua (16-14), los occitans capviravan la marca dins lo segond temps per s'impausar 30-22.
 
Novèl desplaçament en Anglatèrra aqueste dissabte 10 pels tolosans cò dels Viquings de Widnes.
 
Lo dissabte 17 d'agost, a 8 oras del ser, a Blanhac, los occitans reçaupràn Batley. Originalitat: dintrada a gratis pels espectators qu'arribaràn entre 6 oras e mièja e 7 oras!
 
 
NRL: cordelada d'ensages
 
Los espectators australians se pòdon pas plànher de l'abséncia d'espectacle, vist lo nombre d'ensages marcats dins las partidas de la vintena jornada del campionat NRL (www.nrl.com).
 
Victòrias bèlas al defòra per Canberra a Wellington: 46-12; Melbourne a Brisbane: 40-4. Victòrias a domicili pels Tigres fàcia als Vaquièrs: 28-4, per Manly fàcia a Newcastle 30-6, Cronulla fàcia als Lapinons: 39-24, los Poletons contra los Titans: 58-6.
 
Doas partidas foguèron mai disputadas: Canterbury bat Penrith: 16-8 e Parramatta va ganhar a St Jòrdi: 12-4.
 
Amb aquelas desfaitas, los Combatents neozelandeses e los Vaquièrs pòdon dire adieu a las pelhòfas. A 6 punts de Melbourne, tres esquipas son en luta per la segonda plaça: los Polets, los Lapinons e Canberra. Dimenge, a Sydney, los Lapinons reçaupràn la Tempèsta de Melbourne.
 
 
 
 
Alan Roch

 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
5.

#4 E ben! Sembla que lo Fornièr, ex-futur papa, s'es reencarnat dins lo president dels sancionaires! Tantas sancions... Mancan pas que los lenhièrs de la Santa Inquisicion, pecaire!

  • 1
  • 0
L\\\'Alan Carcassona
4.

Bon, Edwards es pas brisa sancionat !!!!!!!!
Es complications per seguir las decisions !!!!!

  • 1
  • 0
L\'Alan Carcassona
3.

Sancions revistas en apèl :
• Edwards pren 4 partidas
• Confirmation per Tomkins : 3 partidas
• umentación per Mac Ilorum : 2 partidas
• Mas pas de suspension per Simon e Williame.

La direccion de la partida per l'arbitre mesa en causa per la RFL que remanda aquesta setmana En Child en Championship per arbitrar... Tolosa !

  • 1
  • 0
L\\\'Alan Carcassona
2.

Intervendrai aqueste dimars 13 d'agost a l'Escòla Occitana d'Estiu, a Vilanuèva d'Òlt, , cap a 5 oras del vèspre sus « Istòrias de rugbí ».
+ presentación e signatura del libre « Lo XIII, aquò òc ! »

  • 2
  • 0
L\'Alan Carcassona
1.

E las sanccions son tombadas :
3 partidas per Tomkins
Una per McIlorum, Williame e Simon ; passatge dabans la comission per K. Edwards.

Un sol sancionat a w-Warrington : una partida per Lineham.
Sens comentari.

  • 2
  • 0

Escriu un comentari sus aqueste article