Bandièra01 1180x150: Comuna de Tolosa

Actualitats

Veneçuèla: se publica de fòtos de Guaidó amb de narcotrafegaires paramilitars

Lo procuraire general de Veneçuèla a anonciat qu’examinariá los imatges per “esclarir los sospechats ligams de Guaidó amb d’organizacions paramilitaras”

S’es publicat qualques fòtos del cap de l’oposicion de Veneçuèla, Juan Guaidó, acompanhat de membres d’un grop paramilitar de narcotrafegaires en Colómbia. Aqueles imatges se faguèron en febrièr passat quand Guaidó aviá quitat clandestinament lo país per assistir a un concèrt que se fasiá en Colómbia, près de la frontièra, contra lo regim veneçolan. Aquel jorn, l’oposicion veneçolana, amb lo sosten dels Estats Units, ensagèt de far intrar d’ajuda umanitària en Veneçuèla, mas i reüssiguèron pas e l’ensag s’acabèt amb d’incidents fòrça grèus.
 
De son caire Guaidó, conegut per s’èsser autoproclamat president de Veneçuèla, afirma que lo govèrn de Maduro vòl distraire l’atencion amb aquelas fòtos. A pas contestat los imatges mas a dich que sabiá pas qual èran aquelas personas. "I aguèron de centenats de fòtos aquel jorn e après que foguèrem arribats al concèrt, de milièrs. Èra complicat de triar qual demanda una fòto", çò a declarat per se defendre. Pel president Nicolás Maduro s’agís d’un escàndol enòrme.
 
Lo procuraire general de Veneçuèla a anonciat qu’examinariá los imatges per “esclarir los sospechats ligams de Guaidó amb d’organizacions paramilitaras”.
 
Las tensions entre los govèrns de Veneçuèla e Colómbia son ara fòrça grandas e inquietantas e las frontièras refortidas per d’efectius nombroses de las respectivas armadas, après que Nicolás Maduro a anonciat que se cercava tornarmai d’atemptar a sa vida.

 
 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
4.

se pòt criticar Maduro e lo chavisme, i a pro de rasons per aquò; mas cal sustot denonciar fòrt e mòrt que lo clòne de Rivera que l’ultraliberalisme estatunian a causit coma opausant es un bandit de primièra, a la nautor d’un Bolosonaro.

  • 10
  • 0
Mèfi ! 31
3.

#2 Coma que siásque, article benvengut que se trapa pas dins la prèmsa de França, que nos manipula.
Cal saludar la vòstra independència.

  • 8
  • 0
Gerard Joan Barceló Pèiralata
2.

#1 Lo non-acòrdi es en aquel cas mai idiomatic (passiu impersonal). Pensi que val mai d'escriure a la redaccion per de questions estrictament lingüisticas que comentan pas l'actualitat.

  • 9
  • 0
Mèfi! 31
1.

"Se publica de fòtos" *? // se publican de fòtos
Me sembla que "se" sia pas un subjècte del vèrb, (coma le "on" francés), mas un pronom refleissit del vèrb, e que le subjècte sia "fòtos", dambe que le vèrb s'accòrda...
En catalan, castelhan e italian, ne va parièr...

  • 1
  • 3

Escriu un comentari sus aqueste article