Bandièra01 1180x150: Comuna de Tolosa

Actualitats

Rugbi de XIII: Tolosa-Olimpic XIII vos espèra dimenge a Blanhac

Dins aquestes tempses de fasas finalas e eliminatòrias, i agèt mai de suspresas dins los campionats angleses (Superliga e Championship) qu'en Austràlia

Aqueste dimenge 29, a Blanhac (19h30), lo Tolosa Olimpic compta sul sosten dels occitans per se ganhar la plaça en finala del Championship
Aqueste dimenge 29, a Blanhac (19h30), lo Tolosa Olimpic compta sul sosten dels occitans per se ganhar la plaça en finala del Championship | Alain Montsegur / TO XIII
Superliga: Warrington s'acontentarà de la Cup
 
En Superliga, Warrington (4n) recebiá Castleford (5n). Los vesitaires se mostrèron mai entreprenents que los Lops. Los Tigres menavan 6-0 a la pausa, puèi 14-6. Los Lops tornavan a dos punts e ne demoravan aquí. Warrington s'acontentarà doncas de la Cup.
 
Dins l'autra partida, divendres, Wigan teniá a distància Salford: 18-12.
 
Dijòus al ser, Salford reçauprà Castleford. La sason s'acabarà pel perdent.
 
St  Helens reçauprà Wigan per una plaça en finala divendres de ser. Lo perdent rescontrarà lo ganhant de Salford-Castleford per designar lo segond finalista.
 
 
Championship: los Tolosans bastisson pas de cabana en Canadà
 
D'unes avián pretendut qu'Yòrk aviá pas forçat a Tolosa per se dispensar d'un viatge en Canadà. S'èra lo cas, èra un plan marrit calcul, vist qu'aqueste dissabte, Yòrk a perdut sus sa pelena contra Featherstone, e pas sonque un pauc: 4-30.
 
Dimenge, en Canadà, Tolosa faguèt jòc egal un vintenat de minutas amb la formacion locala abans d'encaissar tres ensages en 6 minutas. Tres ensages en fin de partida permetèron als occitans de sortir de la pelena amb una desfaita onorabla: 40-24.
 
Per tornar a Toronto e jogar la finala dins una quinzenada, los occitans deuràn batre Featherstone aqueste dimenge de ser a Blanhac (19h30). Lo Tolosa Olimpic espèra que lo pòble tretzista occitan vendrà en nombre portar tot son sosten a la formacion de la crotz dels comtes Ramon.
 
 
NRL: Lapinons e Tempèsta en mièja finala
 
Divendres, las Aglas de Manly e los Lapinons faguèron a ten-tu ten-ieu, mas un carton jaune foguèt fatal per las Aglas de mar e los jogaires de Sydney s'impausèron 34-26.
 
Dissabte, Melborna dalhèt sens pietat l'èrba dels espèrs de las Anguialas de Parramatta: 32-0.
 
Per las finalas preliminàrias (qu'en Austràlia se ditz pas mièjas finalas), se tornaràn doncas trapar los primièrs 4 del classament: divendres, Canberra reçauprà los Lapinons; dissabte, revenge de la finala de l'an passat entre los Polets de Sydney e la Tempèsta de Melbourne.
 
 
Partida de las Províncias d'Origina a Sant Estève
 
Dimenge de vèspre, doas formacions Èst e Oèst (segon lo luòc de primièra licéncia dels jogaires) se rescontraràn sus la pelena de Sant Estève: partida que servirà a la seleccion dels jogaires que partiràn en Austràlia disputar la Copa del Mond de rugbi de IX e qualques partidas contra de seleccions australianas en octòbre.
 
 
Los U19 en Nòva Zelanda
 
Los U19 de França son en Nòva Zelanda per un quinzenat de jorns ont disputaràn quatre rescontres contra las formacions localas. Aqueles escambis internacionals pòdon pas èssser que benefics pels joves jogaires.

 
 
 
Alan Roch
 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article