La polícia indiana detenguèt la setmana passada de centenats de personas a causa de las protèstas contra la polemica lei del ciutadanatge. E mai semble que lo govèrn aja ensajat d’empedir las protèstas, de nombroses manifestants an desobesit e se son acampats dins almens dètz estats.
 
Dins la capitala, Nòva Delhi, de centenats de manifestants foguèron arrestats per aver violat la Lei 144, qu’enebís de reünions de mai de quatre personas sens l’autorizacion del govèrn. Per evitar las protèstas, las autoritats barrèron la frontièra de Delhi amb l’estat d’Haryana per evitar l’arribada d’autobuses plens de manifestants que volián jónher las mobilizacions. Tanben, bloquèron los servicis de votz e donadas d’Internet e los messatges SMS en divèrses ponches de la vila, comprés dins lo quartièr ont an lor sèti fòrça jornals.
 
 
Una lei islamofòba qu’a indignat tot lo país
 
Las protèstas comencèron dins l’estat d’Assam ont i a una granda diversitat etnica e religiosa, e se son escampilhadas dins tota l’Union. Los protestataris planhon un nòu projècte de lei que vòl donar automaticament lo ciutadanatge indian a totas las minoritats non musulmanas —sikhs, crestians, indós o bodistas, entre d’autres— sortidas de Bangladèsh, de Paquistan e d’Afganistan.
 
Los opausants denóncian qu’aquela lei es en contradiccion amb la laïcitat constitucionala e qu’es clarament islamofòba. Los musulmans representan lo 14% de la populacion e aquela lei coïncidís amb lo fach que lo govèrn decidiguèt de retirar l’estatut d’autonomia de Cashmir, una region musulmana disputada amb Paquistan.