Pau aculhirà aqueste diluns que ven, 13 de genièr, la reünion del G5 Sahel, çò es la coordenacion politica entre los estats de Mauritània, Mali, Burkina Faso, Niger e Chad. L’eveniment farà venir inaccessible lo quartièr pus central de la capitala de Bearn, dich “deu Castèth”, ont solament i poiràn accedir a pè los que i demòran, i trabalhan o quaques jornalistas acreditats. A mai, los comèrcis poiràn pas desplegar lors terrassas.
 
Segon Occitània Arroja,”lo quartièr deu Castèth que patirà un estat de sètge”. Lo sit informatiu pròche de Libertat rapòrta tanben que la venguda del president de França, Emmanuel Macron, contunharà dimars amb la pòstinauguracion del primièr autobús electric de la vila sonat Fèbus. De soslinhar que lo Fèbus s’inaugurèt ja en setembre passat e que la preséncia de l’occitanisme faguèt parlar en occitan lo cònsol màger palés, François Bayrou.