Bandièra01 1180x150: País Invisible

Actualitats

Madrid: Alidé Sans pòrta l’occitan dins lo jorn internacional de la lenga mairala

Qualques govèrns regionals an organizat una jornada per metre en valor las lengas autoctònas de l’estat espanhòl. Catalonha i a aduch l’occitan al costat del catalan

La cantadora galèga, Guadi Galego faguèt un concèrt acompanhada de la cantadora aranesa Alidé Sans de la catalana Clara Peya, del basco Mikel Urdangarin
La cantadora galèga, Guadi Galego faguèt un concèrt acompanhada de la cantadora aranesa Alidé Sans de la catalana Clara Peya, del basco Mikel Urdangarin
L’occitan èra present ièr a Madrid dins l’encastre del jorn internacional de la lenga mairala. En aquela escasença, los govèrns regionals de Galícia, d’Euskadi, de Navarra, Catalonha, del País Valencian e de las illas Balearas autrejan lo Prèmi de la Promocion de la Realitat Plurilingua e organizan una jornada per metre en valor las lengas territorialas de l’estat. La Generalitat de Catalonha i aduguèt lo catalan e l’occitan. Atal, de ser, la cantadora galèga, Guadi Galego, qu’ongan a daverat lo guierdon, faguèt un concèrt acompanhada de la cantadora aranesa Alidé Sans de la catalana Clara Peya, del basco Mikel Urdangarin.

 
Prèmi de la Promocion de la Realitat Plurilingua
 
Lo Prèmi de la Promocion de la Realitat Plurilingua l’autrejan los govèrns regionals citats adès, e Guadi Galego l’a ganhat ongan amb son darrièr disc entitolat Immersion ont se canta dins sèt lengas territorialas de l’estat espanhòl.
 
Lo guierdon s’instaurèt en 2008 a l’ocasion de l’An Internacional de las Lengas promogut per l’UNÈSCO, e cèrca de reconéisser lo prètzfach realizat per de personas, associacions o societats que se baton per defendre e desvolopar la diversitat lingüistica de l’estat espanhòl e per difusar las lengas autras que lo castelhan.
 
L’estat espanhòl reconeis la lenga castelhana, tanben dicha espanhòl, coma lenga oficiala dins tot l’estat, e impausa per sa Constitucion a cada ciutadan lo dever de l’aprene, mas reconeis l’oficialitat del catalan (tanben sonat valencian), del castelhan, del galèc e del basco. E mai l’Estatut de Catalonha reconeis la lenga occitana coma oficiala dins lo tot territòri administrat per la Generalitat. L’occitan es oficial en Catalonha amb la denominacion “occitan, aranés en Aran.
 
D’autras lengas territorialas coma l’asturleonés, l’aragonés, l’arabi darija de Sabta e l’amazigh de Melilla son pas reconegudas oficialas. O son pas tanpauc lo catalan dins las regions d’Aragon e de Múrcia e lo galèc-portugués en Astúrias, Extremadura e Castelha-Leon.



 
 
 
 


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Està força ben que a los Madrile cuna del fachisme, es façan demostracions coma aquesta. Per què tamben i a personas normals progressistas e d'esquerras.

  • 2
  • 0

Escriu un comentari sus aqueste article