Bandièra01 1180x150: Comuna de Tolosa

Actualitats

Harvey Weinstein, condemnat per de viòls e d'agressions sexualas

La jurada a declarat colpable lo productor, que foguèt un dels òmes mai poderoses d’Hollywood

Lo productor d’Hollywood Harvey Weinstein, acusat de desenas d’abuses sexuals, l'an, enfin, declarat colpable après un procès de mai de sièis setmanas. La jurada prononcièt ièr diluns son verdicte après una deliberacion que comencèt lo 18 de febrièr. Pendent las cinc jornadas maratonianas de la deliberacion, la jurada a requerit mai d'un còp d'informacions e d'assisténcia sus las acusacions e las pròvas presentadas.
 
Weinstein l'an declarat colpable de viòls en tresen gra, aquò vòl dire, sens emplegar la fòrça. Per contra, l'an relaxat de l'acusacion pus grèva, la d' "agression sexuala predatòria" (predatory sexual assault), un delicte punit de la preson a perpetuitat-
 
 
Marquèt lo començament del #Metoo
 
L’afar Weinstein foguèt revelat dins la davalada de 2017, e marquèt lo començament del movement #MeToo qu’a ajudat a fòrça femnas a denonciar publicament los secutaments e viòls qu’an patits.
 
 
Denonciat pel primièr còp a Canas
 
L’actritz e realizaira italiana Asia Argento foguèt la primièra femna a denonciar oficialament lo productor estatsunidenc. O faguèt publicament durant la ceremònia de remesa dels prèmis de la 71a edicion del Festenal de Canas, en 2018, ont afirmèt qu’ela foguèt violada
 
“En 1997 foguèri violada aicí a Canas per Harvey Weinstein. Aviái 21 ans. Aqueste festenal èra son terren de caça. Vòli far una prediccion: Harvey Weinstein serà pas pus benvengut aicí”, çò diguèt l’actritz al moment de remetre lo prèmi de la melhora actritz a Samal Yeslyamova per son ròtle dins lo filme Ayka.
 
En mai d’aquò, Argento denoncièt publicament los qu’avián "pas res dich” e “lor comportament indigne”. “Sabètz qual sètz, sabèm QUAL sètz, vos permetrem pas de viure dins l’impunitat”, çò assegurèt.
 



 
 
De legir las opinions de Joan Marc-Leclercq sus aqueste afar:
   
 
 
 
 
abonar los amics de Jornalet
 
 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
3.

En França, païs dels dreches del Macho, son encara a espepissar sul Polanski.
Ieu, quand vegèri qu'anonciavan lo "J'accuse", me diguèri sul pic: "Es conflat, lo tipe!"

  • 6
  • 2
francesc palma
2.

Als EEUU lo chantage es un bon afaire.

  • 2
  • 0
.t
1.

Un article clar , brèu , documentat , shens "pathos" superflú...
Lo necessari , pas mei, pas mens .
Mercé per lo ligam cap aus articles de J-M Leclercq , pertinents , interessants de tornar legir , passadas duas annadas .

Felicitacions per Jornalet .

  • 6
  • 2

Escriu un comentari sus aqueste article