Bandièra01 1180x150: La Passem

Actualitats

InternacionalPoliticaSocietat

Consternacion per la mòrt de Cédric Chouviat après una violenta interpelacion policièra

Detengut pendent un contraròtle estradièr, lo liuraire parisenc diguèt sèt còps “m’estofi” e moriguèt amb una fractura del laringe. Se passèt en genièr mas sonque ara se’n difusa d’imatges e de son

Consternacion en França e endacòm mai per Cédric Chouviat, un liuraire en scooter parisenc de 42 ans. “M’estofi”, çò diguèt sèt còps als policièrs que l’interpelavan a París après un contraròtle de la circulacion
Consternacion en França e endacòm mai per Cédric Chouviat, un liuraire en scooter parisenc de 42 ans. “M’estofi”, çò diguèt sèt còps als policièrs que l’interpelavan a París après un contraròtle de la circulacion
Consternacion en França e endacòm mai per Cédric Chouviat, un liuraire en scooter parisenc de 42 ans, que sa mòrt fa pensar al murtre de George Floyd. “M’estofi”, çò diguèt sèt còps als policièrs que l’interpelavan a París après un contraròtle de la circulacion. Placat e mantengut al sòl, perdèt coneissença e moriguèt dos jorns pus tard. Se passèt al començament de genièr mas los quatre policièrs implicats foguèron arrestats lo 17 de junh passat, quand la nòva foguèt coneguda. Una persona presenta al moment de la detencion filmèt l’agression policièra del temps que Le Monde e Mediapart accedissián a l’enregistrament de son del telefòn mobil de la victima. Aqueles imatges e l’àudio an virat sus Internet.
 
L’enregistrament àudio de la quita victima, lo vidèo enregistrat per un passejaire e lo vidèo enregistrat per un dels policièrs mòstran la tension al moment del crime. Segon l’avocat dels policièrs, Chouviat menava la mòto amb lo telefòn mobil a la man e sa placa d’immatriculacion èra tan lorda que se podiá pas legir. Es per aquò que l’interpelèron; se mostrèt “irrespectuós e agressiu”, segon los policièrs.
 
De son caire, Le Monde rapòrta qu’un testimòni assegura que los policièrs practiquèron la tecnica de l’escanament, mesa en question pel quite ministre de l’Interior francés.
 
Chouviat lo menèron a l’espital en còma, e moriguèt lo 5 de genièr en consequéncia d’una asfixia amb una fractura del laringe.
 
Segon los avocats de la familha Chouviat, aquel murtre deuriá far repensar los metòdes de la polícia. “Totes los foncionaris e lo Ministèri de l’Interior sabon que la tecnica de l’estofament e del placatge ventral pòdon tuar qual que siá quora que siá”. La familha de la victima demanda que los faches sián qualificats de “violéncia volontària amb resultat letal”. Dins una conferéncia de premsa, la veusa e los cinc enfants de Cédric Chouviat an denonciat que “li daissèron pas cap de possibilitat de subreviure”.
 
De lor caire, los foncionaris de polícia planhon d’èsser abandonats pel Ministèri de l’interior. Lo sindicat policièr Aliança Polícia Nacionala de la region parisenca demanda que se daisse “la justícia far son trabalh”.

 
 
 


 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Abram Auvèrnha
6.

De segur los policèirs son pas totes mauvàs, mas podèm pas ignorar que lai a una deriva !
Gaitatz-màs lo temoniatge glhaçant que sèc  : https://bit.ly/2A5tOHy
Aquelh temoniatge sembla pron las recentas revelacions tochant los prepaus racistas d'un  grope privat de Facebook que massava mai de sèt  mila agents de poliça… sèm ben forçats de se pausar quauquas questions…

  • 7
  • 0
Franc Bardòu
5.

De lor caire, los foncionaris de polícia planhon d’èsser abandonats pel Ministèri de l’interior ? Deurián donc anar liure de trucar, gasar, arrancar las mans, espetar los uèlhs, marchar sul cap de las vièlhas dòmnas, foter en garda a vista sense seguida sonque per çò que lor passa pel cap, ficar de genolhós coma de preisonièrs de guèrra de liceans que se plànhon de véser maltractat e mal gerit los apleit de trabalh, lo licèu, puèi finala, de tuar qui vòlon quand vòlon, s'o vòlon sense rendre compte a degun ?

La lei es la meteissa per totes : e la violénica intencionala es sempre la violéncia ? Ont se creson ? Dins una dictatura policièra ? Mas qué lor pòt donar a pensar quicòm aital ? E que se passariá se lo famós ministèri aviá efectivament abandonats aqueles "fonccionaris" ?

#2 Seriá estat plan interessant de demandar a la victima qué podiá ben significar per el "provincial" ? Malstrugament, non li serà gaire possible de nos respondre… Çò que sugr es que s'un amòri me tracta de "provincial", e mai se vivi mai o mens dins l'antica Aquitania, província romana plan mai romanizada que non pas Lutecia, aquò non me dona l'autorizacion de tuar lo que ven de parlar aital. Lo cas contrari donariá possible un vertadièr genocidi.

  • 12
  • 2
Abram Auvèrnha
4.

#1 Òc-ben ! Chouviat (fr) = Chauviac (òc)

  • 3
  • 0
francesc palma
3.

Posar lo genolh damunt lo torax del tirat en terra, es un afar de criminals policiers assassins.

  • 3
  • 2
Enric Tolosa
2.

La siá femna raportèt ièr de matin sul platèl de Pascau Praud qu'En Cedric Chouviat tractèt los agents de "banda de provincials !" De segur aquò excusa res d'aquesta òrra bavadura policièra, mas degús a l'entorn de la taula i trobèt res de redire...

  • 5
  • 0

Escriu un comentari sus aqueste article