Bandièra01 capçalera  1180x150: Novestivada

Actualitats

Sardenha: es enfin possible d’aprene lo catalan alguerés a l’escòla

Lo desplegament d’una lei de 2018 tanben permet l’escolarizacion en sassarés, còrs gallurés e en ligur tabarquin

| Diari de la Llengua
E mai lo sarde faga partida del sistèma educatiu dins las escòlas de Sardenha dempuèi 2015, ara es previst l’ensenhament del catalan a l’Alguer, del còrs gallurés e del sassarés dins lo nòrd de l’illa e del ligur tabarquin dins l’archipèla de Sulcis. Lo Conselh Regional de Sardenha a aprovat las linhas d’accion d’una lei de julhet de 2018 que prevei l’ensenhament d’aquelas lengas dins l’orari escolar s’o demandan aital las familhas dels escolans. Per tant, s’es mesa en òbra l’organizacion de las classas, dels ensenhaires e del finançament de besonh.
 
A l’Alguer, las inscripcions pels corses de catalan se faràn fins al 10 de decembre e lo Comitat Directiu de la Consulta Civica per las Politicas Lingüisticas del Catalan de l’Alguer a fach una crida a las familhas algueresas per qu’aprofièchen “l’oportunitat” d’i inscriure lors enfants dins las escòlas mairalas, elementàrias e segondàrias de la vila catalanofòna de Sardenha.
 
Aquela mesa en òbra de la lei de 2018 es arribada après de grandas campanhas que las an entamenadas divèrses collectius, dont Plataforma per la Llengua.
 
Lo catalan a l’Alguer se tròba en granda fragilitat, mas segon un sondatge oficial fach en 2015, lo 92% dels ciutadans vòlon que la lenga s’aprenga a l’escòla. Aquel estudi tanben ditz que l’88,2% dels abitants compren lo catalan alguerés, lo 36,4% lo parla sens pena e l’8,1% l’escriu.

 



abonar los amics de Jornalet

 

 
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article