Bandièra01 1180x150: La Passem

Actualitats

EspòrtInternacionalPolitica

Copa del Mond de fotbòl 2022: problèma diplomatic per Espanha que reconeis pas Kosova

Lo tiratge al sòrt de la FIFA establís qu’Espanha deu afrontar Kosova e, per tant, concedir de visats pels ciutadans d’un país que vòl pas reconéisser

Lo tiratge al sòrt dels grops de qualificacion a decidit que la seleccion espanhòla deu afrontar Suècia, Grècia, Georgia… e Kosova, un país que l’estat espanhòl reconeis pas
Lo tiratge al sòrt dels grops de qualificacion a decidit que la seleccion espanhòla deu afrontar Suècia, Grècia, Georgia… e Kosova, un país que l’estat espanhòl reconeis pas | EFE
La copa del Mond de fotbòl que se tendrà en Qatar en 2022 pòt portar un problèma diplomatic. Lo tiratge al sòrt dels grops de qualificacion a decidit que la seleccion espanhòla deu afrontar Suècia, Grècia, Georgia… e Kosova, un país que l’estat espanhòl reconeis pas.
 
E mai sia prevista que la copa de la FIFA se tenga en Qatar, la fasa de qualificacion consistís en una partida d’anar e una de venir dins d’estadis de caduna de las seleccions. Per tant, l’estat espanhòl tornarà trobar lo trabuc dels visats pels esportius kosovars. Espanha reconeis pas Kosova, concedís pas cap de visat als ciutadans d’aquel país e a quitament refusat de participar a de reünions internacionalas se i avián d’autoritats kosovaras.
 
De veire cossí se petaçaràn las autoritats espanhòlas que deuràn forçadament far una trèva a la non-reconeissença del país. Se passèt quicòm de similar als Jòcs Mediterranèus que se tenguèron en 2018 en Catalonha. Alavetz, se decidiguèt de remplaçar lo visat per una declaracion jurada sus paraula.
 
Dempuèi l’an 2008 Espanha s’entèsta a reconéisser pas Kosova. Lo president del govèrn d’alavetz, Mariano Rajoy, declarèt que son país cresiá “pas a las declaracions unilateralas d’independéncia”. O diguèt per evitar de reconéisser lo referendum d’independéncia que Catalonha aviá anonciat. Los govèrns espanhòls espanhòls se son entestardits a reconéisser pas Kosova fins al ponch qu’Espanha participèt pas a una reünion de l’UE en Bulgaria fa dos ans a causa de la preséncia dels representants kosovars.
 
En 2013 las autoritats espanhòlas empediguèron quinze scientifics kosovars d’assistir a un congrès a Barcelona. Lor refusèron lo visat perque èran de ciutadans d’un estat non reconegut.

 



abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

E lo PPSOE ( disi ben PPSOE) a capitat d'infiltrar lo caval de Tròia dins Euròpa amb l'inefable José Borrell, catalan per azard e nacionalista espanhòl convencut abans que socialista, coma encargat de la diplomacia europèa. Cal pas comptar sus Euròpa per adobar l'afar. Al contrari : contunha de daissar secutar los partisans d'una Catalonha republicana e democratica. Coma mai va, mens i a d'espèrs de traire d'aquela Euròpa.

  • 8
  • 2

Escriu un comentari sus aqueste article