Bandièra01 1180x150: La Passem

Actualitats

EnvironamentPolitica
crotz-tolosaCreated with Sketch.GasconhaVal d'Aran

Aran: sièis personas inculpadas en seguida de la mòrt de l'ors Cachou

Demest los sièis inculpats i a un politician del govèrn d'Aran, dos foncionaris del Conselh General e un abelhaire. Los ecologistas parlan d'una conspiracion

Sièis personas son inculpadas en seguida de la mòrt de l'ors Cachou, que son cadavre foguèt trobat a Les (Quate Lòcs) lo 9 d'abril passat. E mai l'instruccion judiciària foguèsse secreta, lo jutge de Vielha n'a desvelat una part segon la quala l'animal seriá estat empoisonat amb d'antigèl. Per ara, lo jutge a entendut 15 testimònis.
 
Demest los sièis inculpats i a un conselhièr general d'Aran, dos foncionaris del Conselh General e un abelhaire. Fan partida d'una plataforma antiors de la Val d'Aran que se creèt sus WhatsApp e que ten 114 membres.
 
Segon l'enquista, un dels acusats diguèt sus aquela plataforma e quitament dins lo quite sèti del Conselh General d'Aran que voliá empoisonar l'ors amb d’antigèl. De fach, segon la necropsia incorporada a l'instruccion lo 17 d'abril passat, l'ors seriá estat empoisonat amb una substància que se tròba dins l'antigèl emplegat per las veituras.
 
Per empoisonar l'ors, se serviguèron d'un cèrvi per l'atraire, puèi pausèron d'escas amb d'antigèl.
 
Segon mai d’un grop ecologista, i auriá agut una conspiracion per tuar Cachou que la sostenon lo govèrn aranés e quitament d'associacions antiors de l'autre costat de la frontièra politica.
 
Dins un primièr moment, lo govèrn d’Aran raportèt que la possibla causa de la mòrt de l’ors èra estada una casuda de 40 mètres après l’ataca d’un autre ors. Puèi, assegurèt que se prononciariá pas sus la causa de la mòrt de Cachou.
 
Ara, lo Conselh General d'Aran ven de comunicar que se presentarà coma partida civila dins l'instruccion e que farà una enquista "entà escartar possibles actuacions e actituds que non complisquen damb era professionalitat e rigor que se demore d’un trabalhador public".
 
 
Un ors agressiu que n’avián demandat l’extraccion
 
Se parlèt fòrça de Cachou a causa de sas atacas. En setembre 2019, lo sindic d’Aran d'alavetz, Francés Boya, exigiguèt “era extraccion immediata der os Cachou”. Divèrsas manifestacions de païsans e elevaires o demandèron tanben. Las autoritats de la Generalitat de Catalonha responsablas del programa de reïntroduccion de l’ors dins los Pirenèus avalorèron aquela possibilitat. Mentretant, apliquèron a una carronha un fungicida que li provoquèt de vòmits. Aquò lo persuadiguèt d’atacar pas pus d’animals e a partir d’octòbre n’aviá pas agarrit cap d’autre. Òr, aquel metòde poiriá èsser al centre de la polemica.
 
 
Una mòrt polemica
 
La mòrt de Cachou es totjorn seguida de polemica. Après la necropsia demandada pel Conselh General d’Aran, quatre associacions demandèron una segonda necropsia que permetèsse d’esclarzir las causas de la mòrt, car acusavan lo Conselh General d’Aran d’aver privilegiat una version interessada de la mòrt del plantigrad.
 
La primièra necropsia facha del còrs de l’animal non portèt pas de resultats conclusents. En seguida, lo govèrn d’Aran afirmèt que la possibla causa de la mòrt de l’ors èra estada una casuda de 40 mètres après l’ataca d’un autre ors. Mas los collectius Ipcena, Seo Birdlife, Fapas e la Federacion Ecologista de Catalonha èran convencuts de l’empoisonament de l’ors e demandèron que se tornèsse analisar las rèstas del cadavre. Los ecologistas se basavan sul fach que lo còrs del plantigrad presentava pas de nafraduras de cap d’ataca mas lo sorire sardonic que mòstran los mamifèrs quand morisson empoisonats.
 
Lo Conselh General d’Aran reconeguèt qu’en octòbre de 2019 passat avián aplicat de produches quimics a una carronha que la mangèt l’ors per li provocar de vòmits e lo persuadir d’atacar pas pus d’animals. L’usatge d’aqueles produches quimics inquietèt las associacions ecologistas; cresián qu’es çò qu’auriá tuat l’ors e crenhián qu’aguèsse d’efièches nocius sus d’autras espècias.

 

 
 
 
 
 



abonar los amics de Jornalet

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Bernatmm Tarba
2.

Adishatz, en aquestis darreris ans, que se parlava d'un projet de candidatura d'Aran tarà UNESCO entà d'ester declarada PROTECCION dera BIOSFERA .
Tiòc ! Qu'ac auètz plan legit !
(ça´m par que n'auèm tanben legit quauqu'arren sus aqueth madeish Jornalet ?)

Ja d'aqueth temps qu'em soi pensat de quin morre que an, damb toteras urbanisacions ath torn deras vilas e sus eths camps e prats qu'an desapareishut damb era especulacion...

E maugrat tot que les sembla possible d'ac auèr : Ja que n'auèm era demostracion aquíu : uns "amics e companhs" ben interessats.. uas proteccions desconeishudas e naut plaçadas... un "trica-traca" a drèta e un aute tà squerra, un que hica eths sauses entà arregar e un aute entà hèr carar...

  • 1
  • 0
francesc palma
1.

Per matar a un petit os, tres criminals es varen posar d'acord. Sense comentaris.

  • 2
  • 0

Escriu un comentari sus aqueste article