Bandièra01 1180x150: Comuna de Tolosa

Actualitats

Ponch final a l’acarniment judiciari contra Cédric Herrou

Lo ministèri public l’a perseguit e volgut condemnar dempuèi 2017 per aver portat socors a de migrants e refugiats

| Cédric Herrou
Ponch final a l’acarniment judiciari contra Cédric Herrou. La Cort de cassacion refusèt dimècres passat lo recors de la la Cort d’Apelacion de Lion, çò que lo quite Herrou a considerat coma un “vertadier solaç”, çò rapòrta Le Monde.
 
Per l’agricultor roiasc, de 41 ans, aquela decision marca l’abotiment d’un long procès jalonat de tres proceduras e d’una sasina del Conselh Constitucional, qu’aviá consagrat, en 2018, lo “principi de frairesa”. Per son avocata, Sabrina Goldman, “aquela decision met fin a l’acarniment del ministèri public contra Cédric Herrou e permet de reconéisser enfin de manièra definitiva qu’el a pas fach res mai  qu’ajudar als autres, e que dins nòstra republica la frairesa pòt pas èsser un delicte”
 
En mai de l’an passat, l’avocat general de Lion formèt un recors en cassacion contra la relaxa totala de las proceduras judiciàrias contra Herrou que l’aviá prononciada la quita cort, qu’es lo mai naut tribunal de la Republica francesa. De remembrar que lo delicte d’Herrou èra tot simplament d’aver portat socors a de migrants e refugiats. Mas l’an tanplan enseguit per injúria publica e sustot per aver denonciat de politicas racistas e de maltractaments contra de demandaires d’asil.
 
 
Acusat tanben d’injúria publica


En febrièr de 2019, Herrou èra relaxat pel tribunal correccional de Niça, en seguida de la denóncia depausada pel prefècte del departament dels Alps Maritims per injúria publica. Lo prefècte aviá acusat lo militant umanista d’aver dreiçat un parallelisme entre lo tractament dels migrants dins lo departament e lo dels josieus jos l’ocupacion nazi, e demandava contra Herrou una multa de 5000 èuros.

L’acusacion contra Herrou la depausèt lo prefècte après que l’activita aguèt escrich sus sa pagina Facebook lo messatge seguent: “Benlèu lo prefècte dei Aups Maritims si poiria inspirar dei acòrdis emb l’SNCF pendent la 2a guèrra per lo transpòrt dei jusieus per gerir lo transpòrt dei demandas d’asil”.
 
Herrou esperava una senténcia negativa, e quitament aviá convidat lo mond a se recampar davant lo tribunal de Niça
 
 
Passaire solidari perseguit en justícia
 
Ja en decembre de 2018 la Cort de Cassacion aviá anullat la condemnacion de Cédric Herrou e d’un autre militant de la Val de Ròia, condemnats en apelacion per aver portat assisténcia a de migrants.

Lo pus naut tribunal de la republica francesa faguèt referéncia al principi de “fraternitat” dins la lei e remandèt los dos ciutadans roiasques condemnats a Ais de Provença davant la cort de Lion per que foguèsson jutjats tornarmai.
 
Segon lor avocat, Patrice Spinosi, “es una granda victòria”. Atal Spinosi saludèt la reconeissença d’una “excepcion umanitària que deu conduire a la relaxa” dels dos òmes.
 
 
Condemnat en apelacion a quatre meses de preson
 
Après que foguèt condemnat en primièra instància a una multa de 3000 èuros amb sosta en genièr de 2017, la justícia condemnèt Cedric Herrou a 4 meses de preson amb sosta,per aver portat socors a de migrants e refugiats, com tantes autres roiasques de l’associacion Ròia Ciutadana.
 
L’8 d’agost de 2017 la Cort d’Apelacion d’Ais de Provença diguèt a Herrou sa senténcia. La justícia reconeguèt l’agricultor solidari colpable d’”ajuda a l’immigracion clandestina”. En intrant dins la sala, Herrou aviá proclamat qu’”es lo ròtle d’un ciutadan en democracia d’agir quand i a un defalhiment de l’estat”.
 
 
La solidaritat dels roiasques
 
En agost de 2015, l’estat francés decidiguèt de barrar la frontièra a Ventemilha pels migrants e refugiats. A partir d’aquel moment, la Val de Ròia venguèt lo nòu ponch de passatge, ont èra frequent de trobar de desenas de migrants a se pèrdre sus las estradas e los camins de montanha. Espontanèament, d’abitants roiasques lor venián ajudar. Èran organizats al sen de l’associacion Ròia Ciutadana, e refusavan d’abandonar los migrants, sovent afamats e perduts.
 
Demest aqueles roiasques solidaris se trobava Cédric Herrou, un agricultor d’origina niçarda, qu’èra conegut per aver albergat en cò sieu plusors centenats de migrants. Foguèt detengut cinc còps en gàrdia a vista e jutjat per aver portat socors a de migrants e refugiats. Mentretant, Herrou e l’associacion Ròia Ciutadana demandavan “la legalitat per portar assisténcia”.
 
 
De reconduchas illegalas de menors isolats a la frontièra
 
La cinquena detencion de Cédric Herrou arribava lo 6 de julhet de 2017, just l’endeman d’aver publicat sus Internet un vidèo de gaireben 12 minutas que denonciava de practicas illegalas de las autoritats francesas amb los immigrants refugiats menors. Lo vidèo, entitolat Anar-Retorn, foguèt fach amb camèra amagada per la còla de Ròia Solidària a la gara mentonasca de Garavan, e mòstra e denóncia de “reconduchas illegalas de menors isolats a la frontièra” ansin coma un “centre de retencion illegal” al primièr estatge de la petita estacion ferroviària de Menton.
 
 
Canas metèt lo tapís roge per Herrou
 
Après la persecucion, las detencions e las gàrdias a vista, Canas espandiguèt lo tapís roge per Cédric Herrou. Se presentèt al festenal de cinèma, fòra competicion, lo filme documentari de Michel Toesca sul prètzfach umanitari de Cédric Herrou. Entitolat Libre (Liure), lo documentari explica lo prètzfach d’aqueles ciutadans roiasques qu’ajudan als migrants.
 
Produch per Jean-Marie Gigon e per SaNoSi Produccions, lo documentari se menèt a bon tèrme gràcias al sosten d’Emaús França, de Mètges del Mond, de Res Publica, de Ròia Ciutadana e de KissKissBankBank, e se presentèt a Canas en session especiala.
 
 

 


abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article