Bandièra01 capçalera  1180x150: Novestivada

Actualitats

Lo Front Polisario denóncia la mòrt del cap de la gendarmariá en un atac de Marròc amb un dròne israelian

Lo movement politic acusa l’estat francés de s’engatjar militarament al conflicte al Sahara Occidental

Tèxte legit

Lo secretari general del Ministèri saharauí de la Seguretat e la de Documentacion, Sidi Ugal, a confirmat la mòrt del cap de la Gendarmariá del Front Polisario en un atac executat per un dròne contrarotlat per Marròc.
 
“Sauprem combatre los drònes israelians qu’emplega Marròc”, çò diguèt Ugal, après criticar tanben una intervencion militara francesa en favor de Rabat. Ugal soslinhet que lo cap de la gendarmariá, Dah El Bendir, moriguèt en un atac executat per un dròne Harfang, en tot remarcar que Marròc començava de far servir aquela sòrta d’aparelh tre qu’esclatèron los afrontaments en novembre passat. A prepaus d’aquò, afirmèt qu’amb l’usatge dels assassinats selectius Marròc aviá adoptat los metòdes israelians dins los territòris palestinians ocupats. Enfin, soslinhèt que “l’armada saharauí se saupriá adaptar a las nòvas armas introduchas per l’ocupant marroquin”.
 
 
Intervencion francesa
 
En mai d’aquò, Ugal denoncièt l’engatjament de l’armada francesa amb Marròc. Dempuèi longtemps, l’engatjament de França “es pas solament diplomatic” mas tanben se manifèsta per “una preséncia sul terren”.
 
 
Tornarmai en guèrra
 
En novembre passat, lo Front Polisario acusèt Marròc de contravenir a l’alta al fuòc signat en 1991 après lo desplegament de l’armada ocupanta de Marròc a Al Guargarat, per metre fin al blocatge del transit estradièr que realizavan de manifestants saharauís e del Front Polisario.
 
L’èx-colònia espanhòla del Sahara Occidental foguèt ocupada per Marròc en 1975 malgrat la resisténcia del Front Polisario. L’alta al fuòc foguèt signada amb la promessa de la tenguda d’un referendum d’autodeterminacion, mas l’oposicion de Marròc e las diferéncias sus l’elaboracion de la lista electorala l’an empachat.
 


 
abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Julien Berlin
3.

Aquo era una dei darrièras capitadas de Trump abans de partir, aquelei ligams Marròc-Israël.

  • 0
  • 0
Qui vol tuar son gos...
2.

En esperant que Rabat qu'emplèga uèi d'armas israëlianas sofisticadas per ensucar aquel paure Polisario (amb la benediccion de França) se tracha pas un jorn de l'acusar d'islamisme. Seria sul pic l'impunitat totala garantida pel Maruèc e l'ajuda massiva de l'Occident tot per n'acabar amb l'independència sahraoui.

  • 6
  • 1
francesc palma
1.

Los colonizadors castelhans hi portaren la desgracia, coma per tot ont anaren. Visca lo Front Polisari !!!!!

  • 7
  • 0

Escriu un comentari sus aqueste article