Bandièra01 capçalera  1180x150: Novestivada

Actualitats

Marròc a revelat las pressions d’Espanha contra l’independentisme catalan

Lo tèxt critica l’aculhença del cap del Front Polisario, Brahim Ghali, que l’entendèt dimars un tribunal de Madrid

La frontièra a Sabta
La frontièra a Sabta | Wikimedia Commons

Tèxte legit

La crisi entre los reialmes de Marròc e d’Espanha es anada mai luènh. Lo govèrn marroquin a publicat un comunicat dins lo qual detalha las pressions recebudas d’Espanha aquestas annadas contra l’independentisme catalan. “Quina seriá estada la reaccion d’Espanha se se foguèsse recebuda una figura del separatisme espanhòl dins lo palais reial marroquin?”, çò se demanda lo comunicat que compara lo conflicte del Sahara occidental amb lo movement independentista catalan.
 
Lo tèxt critica l’aculhença del cap del Front Polisario, Brahim Ghali, que l’entendèt dimars un tribunal de Madrid après passar qualques jorns dins un espital de Logronh ont èra sonhat de la covid-19. Ghali deu afrontar una denóncia per torturas e detencion illegala, mas lo jutge, per ara, l’a daissat en libertat. En seguida Ghali es tornat partir devèrs Argeria.
 
Lo fach que Ghali anèsse d’Argeria en Espanha per èsser sonhat a fòrça irritat l’administracion marroquina que dobriguèt la frontièra de Sabta en daissant passar de milièrs de migrants e mai menacèt de reconéisser l’independéncia de Catalonha e de donar l’asil politic a Carles Puigdemont.
 
Lo president del govèrn espanhòl, Pedro Sánchez, a qualificat la critica de Marròc d’“absoludament inacceptabla” e a respondut al comunicat en assegurant qu’Espanha es lo melhor aliat que pòscan aver dins l’UE. A mai, a criticat lo fach que Marròc aja utilizat los migrants dins aquela crisi.
 
Lo comunicat publicat diluns passat per Marròc afortís que lo conflicte dobèrt es “una question de coeréncia” perque tre que comencèt la crisi catalana, Marròc “s’es plaçat al costat de l’integritat territoriala e de l’unitat nacionala” d’Espanha. De fach, mençona quitament un incident de l’an 2012, quand lo país african empachèt la vesita d’una delegacion economica catalana a la demanda del govèrn de Mariano Rajoy. “En 2017, s’apliquèt la meteissa coeréncia quand Marròc refusèt la sollicitacion de vesita e de reünion amb un grand cap del separatisme catalan”, çò apond.
 
A la fin d’abril de 2017, Marròc cancelèt una mission comerciala conjoncha de Catalonha e Flandra, quand los presidents Carles Puigdemont e Geert Bourgeois volián vesitar lo país nòrd-african acompanhats dels representants d’una trentena de societats. Cap d’autoritat marroquina acceptèt pas de rescontrar la delegacion. Fins ara, solament la premsa bèlga aviá reconegut las pressions espanhòlas per qu’aquela iniciativa capitèsse mal.
 

abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
4.

Lo rei de Marròc e lo rei d'Espanha, dos maufatants tan l'un coma l'autre. Mas de còps que i a, la vertat s'escapa de la boca de l'arlèri. Coma quand Potin li sortiguèt los draps bruts a aquela bèstia de Borrell.

  • 3
  • 1
jordi isant Catalonha
3.

sus lo nom 'Geert: la letra 'g' en olandés/neerlandés se pronóncia 'kh'. /χ/ en alfabet fonetic internacional.
#2

  • 4
  • 1
jordi isant Catalonha
2.

sus lo nom 'Geert: la letra 'g' en olandés/neerlandés se pronónia 'kh'. /χ/ en alfabet fonetic internacional.

  • 3
  • 0
Franc Bardòu
1.

Cossí cantava, lo grand Lluís Llach que mai non canta, ailàs ?

Lo Sànchez deuri‹á apréner lo catalan, non ?

"Què faig aquí a l'autopista?
Què faig perdut a Madrid, amb presos politics catalans,
lluny de la meva casa socialista,
lluny de la meva ideologia d'esquerra ?"

(Parodiat — que ne me perdone loi ciutadan de Verges — de "Esquizoclub", extrait de "Torna aviat", 1991)

  • 12
  • 0

Escriu un comentari sus aqueste article