Bandièra01 1180x150: Comuna de Tolosa

Actualitats

Afganistan: l’armada dels Estats Units ataca l’Estat Islamic amb de drònes e de fusadas

L’Estat Islamic considèra los talibans coma “d’enemics del sang dels musulmans” e los acusa d’èsser “de mariòtas dels Estats Units”

L’armada estatsunidenca a lançat una fusada sus una veitura, per fin de tuar un terrorista suicidari presumit que cercava de tornar far un atemptat a l’aeropòrt
L’armada estatsunidenca a lançat una fusada sus una veitura, per fin de tuar un terrorista suicidari presumit que cercava de tornar far un atemptat a l’aeropòrt | Welt

Tèxte legit

Un dròne de l’armada dels Estats Units a tuat dos caps presumits de l’autoproclamat Estat Islamic en Afganistan e n’a nafrat un tresen. “Un planificator, un procuraire e dos membres de l’Estat Islamic son mòrts e un tresen es nafrat. Avèm pas coneissença de cap de victima civila”, çò a confirmat lo Departament de la Defensa dels Estats Units. L’atac l’an fach coma revenge de l’atemptat de dijòus a l’aeropòrt que son nombre de victimas a aumentat fins a 170. Demest los mòrts i a 13 soldats estatsunidencs. Lo pòrtavotz del comandament central dels Estats Units a explicat dins un comunicat que la buta èra un dels dirigents d’Estat Islamic, que revendiquèt l’atemptat a l’aeropòrt de Kabol. L’operacion s’es producha dins la província de Nangajar, dins l’èst d’Afganistan.
 
A mai, a Kabol, l’armada estatsunidenca a lançat una fusada sus una veitura, per fin de tuar un terrorista suicidari presumit que cercava de tornar far un atemptat a l’aeropòrt. E mai la fusada aja atench sa tòca, 5 civils, dont 3 enfants, son mòrts dins l’atac, segon EFE.

A aquel prepaus, ièr lo president dels Estats Units, Joe Biden, diguèt qu’avián de pistas sus qual aviá ordenat aqueles atacs, e menacèt d’una responsa que prendriá pas en compte pas los jorns de retirament de las tropas estatsunidencas d’Afganistan.
 
La primièra execucion oficiala que la faguèt lo nòu regim dels talibans foguèt justament Abu Omar Khorasani, ancian cap de l’Estat Islamic qu’èra detengut dempuèi lo mes de mai de 2020 dins una preson del govèrn afgan.
 
De fach, l’Estat Islamic considèra los talibans coma “d’enemics del sang dels musulmans” e los acusa d’èsser “de mariòtas dels Estats Units”. Dins aquel sens los jihadistas an anonciat “una èrsa d’atemptats” en Afganistan.

 

abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article