Es partit un micromecenatge per finançar lo primièr album de Lagastina, un libre CD de cançons e de comptinas en occitan per mainatges. S’agís de composicions de Lucia Roulet, musicològa e ensenhaira d’occitan, amb la collaboracion de musicians, grafistas e tecnicians dels quatre cantons d’Occitània. Las illustracions son de l’artista IsapointK.
 
L’album aurà doas edicions, una en gascon e una autra en lemosin; contendrà 6 comptinas e 7 cançons amb la tòca que los enfants jòguen e canten en occitan delà l’escòla, amb de melodias entraïnantas, d’instruments variats dins de composicions d’una modernitat bastida sus las rasics de la cultura occitana.
 
 
L’occitan en familha
 
La tòca del libre CD es d’incorporar l’occitan dins la vida vidanta, de la far descobrir, la far viure o reviure. Que siá pas considerat solament coma una matèria escolara: “una lenga se viu, se vei, se canta, s’arrid, se parteja”.
 
Arunan sus Òc Tèle, Roulet raportava que lo confinament aviá fòrça ajudat a far viure la lenga occitana dins las famihas. Ela explicava que durant aquel periòde i aviá agut una demanda fòrta que la menava a bastir mai de material, e tanben prepausèt de lecturas d’albums cada setmana en dirècte sus la pagina Facebook de Lagastina e sus sa cadena YouTube.
 
 
Un lagast violet
 
Lagastina es lo rèirenom d’un pofre violet (un lagast en gascon) que fa la mascòta dels corses d’occitan de Lucia Roulet. Es lo personatge menaire de las classas e lo personatge inspiraire del blòg consagrat al material pedagogic per ensenhar l’occitan.
 
Lagastina a fach descobrir la cultura occitana a las familhas en partejant de moments caloroses, subretot a travèrs de las cançons e de las comptinas que Roulet a creat  especialament pels enfants.
 
 
Divèrsas recompensas previstas
 
La còla de Lagastina a previstas divèrsas recompensas pels que participaràn, d’una cançon e son illustracion en format numeric fins al libre CD, l’escudet oficial, un polit sac e quitament una mini-Lagastina facha a la man per Le Tricot Français.