Bandièra01 1180x150: País Invisible

Actualitats

Sarkozy condemnat a un an de preson ferma per l’afar Bygmalion

La jutgessa a soslinhat que l’èx-president “coneissiá lo limit legal de despensa” e a dich que dos còps “foguèt avertit per escrich del risc de lo superar”

| Reuters

Tèxte legit

La justícia a condemnat l’èx-president francés Nicolas Sarkozy a un an de preson ferma per l’afar Bygmalion, çò es pel finançament illegal de sa campanha electorala de 2012. Aquela senténcia arriba mièg an après que l’èx-cap de l’estat foguèt condemnat a tres ans de preson pels delictes de corrupcion e trafec d’influéncia. La pena la deurà complir jol regim de susvelhança electronica. L’èx-president a anonciat que depausariá un recors. Lo meteis tribunal a condemnat a tres ans de preson Jérôme Lavrilleux, director del gabinet de Jean-François Copé e director adjonch de la campanha de Sarkozy.
 
Pendent la lectura del verdicte, la jutgessa Caroline Viguier a soslinhat que “Sarkozy coneissiá lo limit legal de despensa” e a dich que dos còps “foguèt avertit per escrich del risc de lo superar”, çò rapòrta Le Monde. Dins aquel sens a mes l’accent sul fach que “Sarkozy coneissiá los comptes de sa campanha”, e a apondut que la despensa trespassava lo limit de mai de 16,2 milions d’èuros. “Lo tribunal considèra que lo lindal foguèt superat a partir de la 18a reünion, la del 31 de març de 2012. A partir d’aquela data, cada eveniment public impliquèt una infraccion”, çò a precisat.
 
 
L’afar Bygmalion
 
L’èx-president de la Republica Francesa, Nicolas Sarkozy, foguèt mes en examen lo 16 de febrièr de 2016 per “finançament illegal” de sa campanha presidenciala de 2012, a causa d’un despassament del plafon dels comptes de campanha.
 
Après l’entendre durant 12 oras, los jutges del pòl financièr del tribunal de granda instància de París tanplan decidiguèron de plaçar l’èx-president francés jos l’estatut de testimòni assistit per “fals, escrocariá e abús de fisança”. O faguèron dins l’encastre de l’afar Bygmalion, un escàndol que se nomena coma la societat que faguèt de facturas falsas d’aperaquí 18,5 milions d’èuros per que l’UMP, lo partit de Sarkozy, poguèsse justificar de despensas qu’en vertat correspondián a la campanha electorala.
 
Amb Sarkozy son 14 los individús meses en examen per aquel afar, dont los caps de Bygmalion, mas tanben divèrses lidèrs de l’UMP coma l’èx-director general Eric Cesari e los dos responsables de la campanha, Guillaume Lambert e Jérôme Lavrilleux.

 
 
fffff fffff
 Procèsses judiciaris contra Sarkozy
 
Ensag de subornar lo jutge Gilbert Azibert
 
Sakorzy e son avocat, Thierry Herzog, ensagèron de subornar lo jutge Gilbert Azibert al començament de 2014. Alavetz, l’èx-president ensagèt d’obténer, via Herzog, d’informacions secretas que teniá Azibert, alavetz avocat general a la Cort de Cassacion. D’efièch, l’èx-president auriá prepausat a Azibert un pòst prestigiós a Mónegue. A aquel moment Sarkozy èra mes en examen per l’afar Bettencourt.


L’afar de las escotas telefonicas
 
L’afar de las escotas telefonicas es una investigacion ont los enquistaires perseguissián un ret d’informators de la polícia e la justícia qu’aurián filtrat d’informacion a de familiars de Sarkozy dins las proceduras legalas que i es implicat. Per aquela investigacion, los policièrs sometèron a d’escotas telefonicas l’èx-cap d’estat a partir de setembre de 2013. E son aquelas escotas que revelèron que Sarkozy recebiá d’informacion sus las enquistas que l’implicavan.


L’afar Tapie
 
Es un dels mai delicats qu’afrontan Sarkozy e tanben l’èx-ministra de l’economia, Christine Lagarde. Los dos son estats meses en examen per de possiblas pressions sus un jutge per que favoriguèsse l’òme d’afars francés Bernard Tapie en son litigi contra la banca Crédit Lyonnais.
 
 
L’afar Karachi
 
Sarkozy es al còr d’aquela enquèsta sul pagament de comissions milionàrias per la venda de tres sosmarins a l’armada paquistanesa. L’argent ganhat amb aquelas comissions auriá, presumidament, finançat una campanha electorala de Sarkozy dins los ans 90.
 
 
L’afar Bettencourt
 
La justícia met en examen l’èx-president francés per abús de feblesa de Liliane Bettencourt, la nonagenària eiretièra de l’empèri cosmetic L’Oréal. Bettencourt aviá una deméncia mixta e una malautiá d’Alzheimer dins un estat moderadament sevèr. L’investigacion judiciària voliá esclarzir se Sarkozy profechèt de l’estat de la milionària e s’abusèt de sa fisança per li traire d’argent destinat a finançar la campanha que lo menèt a l’Elisi en 2007.
 
 
D’afars escurs amb Muammar Al Qadhdhafi
 
Sarkozy a d’autres procèsses dobèrts amb la justícia, que dins un d’aqueles, se sospiècha que l’èx-president de Libia, Muammar Al Qadhdhafi, auriá subvencionat tanben la campanha de 2007 amb cinquanta milions d’èuros.
 
 
Los sondatges irregulars
 
Sarkozy l’an tanben mes en examen per saber se, pendent son mandat, comandèt a nòu entrepresas de sondatges favorables a sos interèsses.
 
 
L’afar de las escotas telefonicas
 
Los investigators perseguisson un ret d’informators de la polícia e la justícia que, presumidament, filtrèron d’informacion a de familiars de l’èx-president francés dins las proceduras legalas que i es implicat. Per aquela investigacion, los policièrs sometèron a d’escotas telefonicas l’èx-cap d’estat a partir de setembre de 2013. E son aquelas escotas que revelèron que Sarkozy recebiá d’informacion subre las investigacions que l’implicavan. 
 
   


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

La Sintaxi de Rousseu Endaxòm
5.

Aprèp fanton...

ghduayrkgrrrrtarprout... GFF

  • 1
  • 1
Valcanin
4.

Foguèt condemnat lo cap d'stat illegitim de dicha Frància, Micolau Sarcòsi, que l'aviá superada la ment mala. Es tras qu'injust lo condemniment son, qu'onc non foguèt jamai condemnat ni a una multa pel mesprés que patiguèt la nacion occitana amai non o se reconega ges a causa de l'stat francimand vergonhosissim. ça que la, decidiguèt una còla d'occitans animoses de redactir un pediment ante los diches judicitges del se disent estat illegitim, opremidor, jacobin, imperialista, dictadoiral, e mai que mai que tot occitanofòb, eca.

  • 4
  • 0
Entre people de bona compania Politicum Lutecia
3.

I sem acostumats. Pas besonh de se trucar lo cap per endevinhar cossi aquesta s'acabarà : per un non-luèc. Exactament coma totas las autras.

  • 4
  • 0
Franc Bardòu
2.

Président Sarkozy : a pro pena un an de preison fèrma per l'afar Bygmalion.
President Puigdemont : 13 ans preisons per aver organizat un referedum democratic…
Parlatz-nosde justícia !

  • 19
  • 1
L’Òme Sent Perdon
1.

  • 2
  • 0

Escriu un comentari sus aqueste article